Американинг Делавер штатида АҚШ президенти Жо Байденнинг ўғли Ҳантер Байденга қарши биринчи суд жараёни бошланди. Бу ҳақда Deutsche Welle хабар берди.
3 июнь куни 54 ёшли Ҳантер Байден Уилмингтон судида қуролни ноқонуний сақлашда учта айблов бўйича сўроқ қилинган. Ҳантер Байден суд мажлисида рафиқаси ва ўгай онаси, АҚШнинг биринчи хоними Жилл Байден ҳамроҳлигида қатнашган. Суд жараёни бир ҳафтадан икки ҳафтагача давом этиши кутилмоқда.
Жо Байден ўз баёнотида суд жараёнлари ҳақида изоҳ беришни истамаслигини, лекин ўғлини яхши кўриши, ишониши ва унинг кучлилиги учун ҳурмат қилишини айтган.
Ҳантер Байденга қўйилган айбловлар
Собиқ адвокат, лоббист ва бизнесмен Ҳантер Байден 2018 йилда Cоlt Cobrа .38 револверини сотиб олиш учун бланкаларни тўлдираётганда гиёҳванд моддаларни истеъмол қилмаслик ҳақида ёлғон гапирганликда айбланган. Ўша йилнинг октябрь ойида у гиёҳвандлик ҳолатида 11 кун давомида қурол сақлаган. Бу ҳолатда Ҳантер Байден 25 йилгача қамоқ жазоси, шунингдек, 750 минг доллар жаримага тортилиши мумкин.
11 кун давомида ўқсиз қуролга эга бўлган Ҳантер Байден жамоат хавфсизлигига таҳдид солмаган, аммо сиёсий босимга берилиб кетган прокурор адлия тизимимизга жиддий хавф солмоқда, — дейди кичик Байденнинг адвокати.
Бу Қўшма Штатлар тарихида амалдаги президентнинг фарзандига қарши биринчи суд жараёнидир.
Ҳантер Байденга нисбатан тергов 2018 йилдан бери давом этмоқда. 2023 йилда у солиқ тўлашдан бўйин товлаганлик ва ноқонуний қурол сақлаш айбини тан олишга рози бўлган. Судгача бўлган келишув унга ҳақиқий жазони енгиллаштиришга ёрдам бериши керак эди. Округ суди судьяси Мариеллен Норейка тегишли келишувни имзолашдан бош тортгани учун айблов шартномаси бузилган. Шартнома бузилганидан сўнг, Ҳантер Байден айбини тан олишдан воз кечган.
Изоҳ (0)