Isroil bosh vaziri Binyamin Netanyaxu mamlakat armiyasi HAMAS bilan urushni 42 kunga to‘xtatishi mumkinligini aytdi. Bu haqda The Times of Israel xabar berdi.
Netanyaxuning so‘zlariga ko‘ra, Isroil G‘azo sektoridagi jangovar harakatlarni olti haftaga to‘xtatishga tayyor, biroq o‘t ochishni to‘liq to‘xtatishga rozi bo‘lmaydi.
Garovga olinganlarni qaytarish uchun urushni 42 kunga to‘xtatib qo‘yishimiz mumkin. Ammo urushni to‘liq to‘xtata olmaymiz. Eron va barcha dushmanlar taslim bo‘lamizmi yoki yo‘q, kuzatmoqda, — dedi u.
Bosh vazir AQSH prezidenti Jo Bayden tomonidan ilgari surilgan otashkesim rejasida “bo‘shliqlar” borligiga to‘xtaldi.
Bayden taqdim etgan taklif to‘liq emas. Urush garovga olinganlarni qaytarish uchun to‘xtatiladi, keyin esa muhokama qilamiz. AQSH prezidenti ommaga taqdim etmagan boshqa tafsilotlar ham bor, — deya tushuntirdi Netanyaxu.
Bayden taqdim etgan reja uch bosqichni o‘z ichiga oladi. Jumladan, G‘azoda olti haftaga o‘t ochishni to‘xtatish, barcha garovga olinganlarni ozod qilish, Isroil qo‘shinlarining G‘azo sektoridan to‘liq olib chiqib ketish, falastinliklarning G‘azoga qaytishi, vayronalarni tiklash.
Netanyaxuning ta’kidlashicha, urushni tugatish bo‘yicha asosiy shartlar, xususan, HAMASni yo‘q qilish va barcha garovga olinganlarni ozod qilish sharti o‘zgarmagan.
Izoh (0)