Isroilda 7-oktyabr voqealarini tergov qilish bo‘yicha davlat komissiyasini tuzish talabi siyosiy bo‘lib, bosh vazir Binyamin Netanyaxu hukumati va hukmron partiyaning qulashiga olib keladi. Bu haqda bosh vazir devonidagi yuqori martabali amaldorlarga tayanib, Ynet nashri xabar berdi.
Isroil Milliy xavfsizlik shtabi rahbari Hanegbi siyosiy arboblar bilan bo‘lib o‘tgan suhbatda “davlat tergov qo‘mitasining vazifasi o‘ng qanot hukumatni yo‘q qilish” ekanini aytdi. Yana bir yuqori martabali mulozimga ko‘ra, Netanyaxu tergov qo‘mitasini tashkil etish borasida kamdan-kam gapiradi va uning tuzilishiga qarshi.
“Netanyaxu sudyalarga ishonmaydi. Huquqiy islohotlar tufayli ular undan o‘ch olishlaridan qo‘rqadi”, — deydi u.
Ta’kidlanishicha, Netanyaxu davlat tergov komissiyasini tuzish haqidagi chaqiriqlar kuchayib borayotganidan xavotirda. Isroil bosh vaziri tergov olib borilishi hukumat ag‘darilishiga olib kelishi mumkinligidan xabardor.
Davlat tergov komissiyasini tuzish chaqirig‘iga barcha muxolif partiyalar, Likud partiyasining ko‘plab deputatlari va vazirlar qo‘shilgan. Biroq Netanyaxu, yuqorida aytib o‘tilganidek, ortib borayotgan talabdan xavotirda. Harbiy vazirlar mahkamasi aʼzosi Benni Gants hukumatga davlat tergov komissiyasini tuzish taklifini ham kiritgan, ammo Netanyaxuning idorasi bu taklifni rad etishga qaror qilgan.
- Eslatib o‘tamiz, Yaqin Sharqdagi vaziyat 2023-yil 7-oktyabr kuni G‘azo sektoridan HAMAS jangchilarining Isroil hududiga kirib kelishi, chegaradagi aholi punktlari aholisining o‘ldirilishi va 200 dan ortiq kishining garovga olinishidan keyin keskin yomonlashdi.
- 3-iyun holatiga ko‘ra, Isroil hujumlari oqibatida G‘azoda o‘lganlar soni 36,439 nafarga yetdi.
- Ularning 15 mingdan ortig‘i bolalardir.
Izoh (0)