Исроилда 7 октябрь воқеаларини тергов қилиш бўйича давлат комиссиясини тузиш талаби сиёсий бўлиб, бош вазир Биньямин Нетаньяху ҳукумати ва ҳукмрон партиянинг қулашига олиб келади. Бу ҳақда бош вазир девонидаги юқори мартабали амалдорларга таяниб, Ynet нашри хабар берди.
Исроил Миллий хавфсизлик штаби раҳбари Ҳанегби сиёсий арбоблар билан бўлиб ўтган суҳбатда “давлат тергов қўмитасининг вазифаси ўнг қанот ҳукуматни йўқ қилиш” эканини айтди. Яна бир юқори мартабали мулозимга кўра, Нетаньяху тергов қўмитасини ташкил этиш борасида камдан-кам гапиради ва унинг тузилишига қарши.
“Нетаньяху судьяларга ишонмайди. Ҳуқуқий ислоҳотлар туфайли улар ундан ўч олишларидан қўрқади”, — дейди у.
Таъкидланишича, Нетаньяху давлат тергов комиссиясини тузиш ҳақидаги чақириқлар кучайиб бораётганидан хавотирда. Исроил бош вазири тергов олиб борилиши ҳукумат ағдарилишига олиб келиши мумкинлигидан хабардор.
Давлат тергов комиссиясини тузиш чақириғига барча мухолиф партиялар, Ликуд партиясининг кўплаб депутатлари ва вазирлар қўшилган. Бироқ Нетаньяху, юқорида айтиб ўтилганидек, ортиб бораётган талабдан хавотирда. Ҳарбий вазирлар маҳкамаси аъзоси Бенни Ганц ҳукуматга давлат тергов комиссиясини тузиш таклифини ҳам киритган, аммо Нетаньяхунинг идораси бу таклифни рад этишга қарор қилган.
- Эслатиб ўтамиз, Яқин Шарқдаги вазият 2023 йил 7 октябрь куни Ғазо секторидан ҲАМАС жангчиларининг Исроил ҳудудига кириб келиши, чегарадаги аҳоли пунктлари аҳолисининг ўлдирилиши ва 200 дан ортиқ кишининг гаровга олинишидан кейин кескин ёмонлашди.
- 3 июнь ҳолатига кўра, Исроил ҳужумлари оқибатида Ғазода ўлганлар сони 36,439 нафарга етди.
- Уларнинг 15 мингдан ортиғи болалардир.
Изоҳ (0)