Isroil armiyasining jangovar samolyotlari Suriyaning Halab shahri yaqinidagi harbiy pozitsiyalarga hujum qildi. Oqibatda kamida 12 nafar askar halok bo‘ldi, bir necha harbiy yaralandi. Bu haqda Al Hadath telekanali xabar berdi.
Ma’lum qilinishicha, Isroil armiyasi 3-iyunga o‘tar kechasi Suriyaning Xayyan rayoniga o‘t ochgan. U yerda havo hujumidan mudofaa tizimlari ishga tushgan va raketalarning bir qismini tutib olgan.
Havo hujumi natijasida bir necha kishi halok bo‘ldi va moddiy zarar yetdi, — deydi Suriya Mudofaa vazirligidagi manba SANA agentligiga.
Isroil harbiy rasmiylari Suriyaga zarbalar Eron tomonidan qo‘llab-quvvatlangan jangchilarga, jumladan, “Hizbulloh” guruhiga qarshi qaratilganini aytmoqda.
Eslatib o‘tamiz, 1-aprel kuni Isroil Damashqdagi Eron konsulligiga aviazarba bergandi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi hoji Rahimiy va yana besh eronlik zobit ham halok bo‘lgandi. Shuningdek, uch nafar Suriya va bir nafar Livan fuqarosi vafot etgan. Bunga javoban 14-aprel kuni Eron tunda 300 dan ortiq dron, qanotli va ballistik raketalar bilan Isroilga hujum qilgandi.
Isroil armiyasining da’vo qilishicha, 14-aprel kuni mamlakatga yaqinlashayotgan raketa va dronlarning 99 foizi Arrow uzoq masofali raketaga qarshi mudofaa tizimi va qiruvchi samolyotlar tomonidan yo‘q qilingan. Eron harbiy shtab-kvartirasi hujumni “muvaffaqiyatliroq” deb atagan va javob hujumi bo‘lgan taqdirda “kattaroq kuch bilan” zarba berishni va’da qilgan.
Izoh (0)