Saudiya Arabistoni Shveysariyadagi Ukraina bo‘yicha tinchlik sammitida ishtirok etmaydi. Bu haqda qirollikdagi diplomatik manbalarga tayanib, DPA nashri xabar berdi.
Hukumatning ushbu qaroriga 15—16-iyun kunlari bo‘lib o‘tadigan sammitda Rossiyaning ishtirok etmasligi sabab bo‘ldi, — deya aniqlik kiritgan nashr.
Ar-Riyod hozircha mazkur qarorini rasman e’lon qilgani yo‘q.
Xitoy ham anjumanda qatnashishdan bosh tortgan. Avvalroq Xitoy TIV kun tartibi Pekin talablari va jahon hamjamiyatining umumiy umidlaridan ajralib turishini aytib, Xitoyning sammitda ishtirok etishi dargumon ekanini ta’kidlagan. AQSH prezidenti Jo Baydenning ishtiroki ham so‘roq ostida.
Shveysariyadagi Tinchlik konferensiyasi
Shveysariya 15—16-iyun kunlari Lutsern yaqinida Ukraina bo‘yicha konferensiyaga mezbonlik qiladi. Uchrashuvga 160 ga yaqin davlat vakillari taklif etilgan. Rossiya mazkur tadbirga taklif qilinmagan.
Rossiya TIV rasmiysi Mariya Zaxarovaning taʼkidlashicha, Moskva Vladimir Zelenskiy formulasi bo‘yicha keyingi uchrashuvda qatnashmaydi va qatnashmoqchi emas.
Rossiya tadbirda ishtirok etishdan bosh tortmoqda, chunki konferensiyadan maqsad mamlakatga ultimatum qo‘yishdir, — deydi Rossiyaning Berndagi elchisi Sergey Garmonin.
Rossiya prezidenti Vladimir Putin Moskva Kiyev bilan muloqotni davom ettirishga tayyor, biroq Turkiya va Belarusda erishilgan kelishuvlar asosida hamda joylardagi vaziyatni hisobga olgan holda unga qaytish mumkin.
Izoh (0)