Isroil AQSH prezidenti Jo Bayden tomonidan taklif etilgan urushni tugatish va G‘azo sektoridagi mojaroni hal etish rejasini qabul qildi. Bu haqda Isroil bosh vaziri Binyamin Netanyaxuning tashqi siyosat bo‘yicha maslahatchisi Ofir Falk xabar berdi.
Netanyaxuning maslahatchisiga ko‘ra, Baydenning rejasini sezilarli darajada qayta ishlash lozim. Folk AQSH prezidentining taklifini “biz rozi bo‘lgan kelishuv” deb atadi.
“Bu unchalik yaxshi kelishuv emas, lekin garovga olinganlarning har birini ozod qilishni juda xohlaymiz”, — dedi u.
Bosh vazir maslahatchisi Isroil o‘zining o‘t ochishni to‘xtatish shartlaridan voz kechmasligini aytdi. Bu shartlar garovga olinganlarning barini ozod qilish va “HAMAS”ni butunlay yo‘q qilishni anglatadi. Bayden taklif qilgan rejaga ko‘ra, mojaroni hal etish uch bosqichda amalga oshishi lozim:
- olti haftalik otashkesim, uning davomida garovga olinganlar ozod qilinadi va G‘azo sektoriga insonparvarlik yordami yetkaziladi;
- jangovar harakatlarni to‘liq to‘xtatish, Isroil qo‘shinlarini G‘azodan to‘liq olib chiqib ketish va konfliktga borgan tomonlar o‘rtasida muzokaralar boshlash;
- urush paytida vayron qilingan hududlarni tiklash.
Falastinning HAMAS harakati o‘t ochishni to‘xtatish va Isroil qo‘shinlarini G‘azodan olib chiqib ketish taklifini olqishlashini bildirdi.
“HAMAS AQSH prezidenti Jo Bayden nutqidagi so‘zlarni va uning doimiy o‘t ochishni to‘xtatish, G‘azo sektoridan harbiy kuchlarni olib chiqish, rekonstruksiya qilish va asirlar almashish haqidagi chaqirig‘iga ijobiy qaraydi”, — deyiladi bayonotda.
Shuningdek, HAMAS ko‘chirilganlarni G‘azo bo‘ylab o‘z uylariga qaytarishni va agar Isroil bu majburiyatni o‘z zimmasiga olsa, mahbuslarni almashish bo‘yicha kelishuvni yakunlamoqchi ekani qayd etilgan.
Izoh (0)