O‘zbekistonda 2024-yil davomida ikki tadbirkorlik subyektining jami 15 milliard so‘mlik manfaatlari himoya qilinishi taʼminlandi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.
Qayd etilishicha, Toshkent viloyatidagi avtomobillarga yonilg‘i quyish shoxobchasi faoliyatini ko‘rsatuvchi MCHJ qo‘mitaga 2024-yil aprel oyida murojaat qilib, “Hududgaztaʼminot” AJ Toshkent viloyati filiali tomonidan asossiz qarzdorlik hisoblanganidan noroziligini bildirib, mazkur masalaning belgilangan tartibda hal etilishida amaliy yordam ko‘rsatishni so‘ragan.
Mazkur murojaat yuzasidan qo‘mitaning Toshkent viloyati hududiy boshqarmasi tomonidan o‘tkazilgan o‘rganishlar natijasida mazkur tadbirkorlik subyektiga nisbatan asossiz hisoblangan 9,6 milliard so‘mlik qarzdorlik “Hududgaztaʼminot” AJ tomonidan “Hududgaztaʼminot korporativ tizimi” elektron dasturida tahrirlash yo‘li orqali chiqarilishi taʼminlanib, tadbirkorning manfaatlari muvaffaqiyatli himoya qilingan.
Shuningdek, Sirdaryo viloyatidagi avtomobillarga yonilg‘i quyish shoxobchasi faoliyatini ko‘rsatuvchi MCHJ qo‘mitaga mart oyida murojaat qilib, “Hududgaztaʼminot” AJ Toshkent viloyati filiali tomonidan asossiz penya hisoblanganidan noroziligini bildirib, mazkur masalaning belgilangan tartibda hal etilishida amaliy yordam ko‘rsatishni so‘ragan.
Murojaat va unga ilova qilingan hujjatlar bo‘yicha qo‘mita tomonidan olib borilgan ishlar natijasida tadbirkorlik subyektiga asossiz hisoblangan 5,3 milliard so‘mlik penya “Hududgaztaʼminot” AJ tomonidan “Hududgaztaʼminot korporativ tizimi” elektron dasturida tahrirlash yo‘li orqali chiqarilishi taʼminlanib, tadbirkorning masalasi ijobiy hal etilishiga erishilgan.
Avvalroq Toshkent viloyatida gaz zapravka sobiq hisobchisi salkam 1 mlrd so‘mni o‘zlashtirgani aniqlangani, Sirdaryodagi metan zapravkada salkam 62,5 mlrd so‘mlik gaz o‘g‘irlangani ortidan ikki kishi ushlangani to‘g‘risida xabar berilgandi.
Izoh (0)