Ўзбекистонда 2024 йил давомида икки тадбиркорлик субъектининг жами 15 миллиард сўмлик манфаатлари ҳимоя қилиниши таъминланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Қайд этилишича, Тошкент вилоятидаги автомобилларга ёнилғи қуйиш шохобчаси фаолиятини кўрсатувчи МЧЖ қўмитага 2024 йил апрель ойида мурожаат қилиб, “Ҳудудгазтаъминот” АЖ Тошкент вилояти филиали томонидан асоссиз қарздорлик ҳисобланганидан норозилигини билдириб, мазкур масаланинг белгиланган тартибда ҳал этилишида амалий ёрдам кўрсатишни сўраган.
Мазкур мурожаат юзасидан қўмитанинг Тошкент вилояти ҳудудий бошқармаси томонидан ўтказилган ўрганишлар натижасида мазкур тадбиркорлик субъектига нисбатан асоссиз ҳисобланган 9,6 миллиард сўмлик қарздорлик “Ҳудудгазтаъминот” АЖ томонидан “Ҳудудгазтаъминот корпоратив тизими” электрон дастурида таҳрирлаш йўли орқали чиқарилиши таъминланиб, тадбиркорнинг манфаатлари муваффақиятли ҳимоя қилинган.
Шунингдек, Сирдарё вилоятидаги автомобилларга ёнилғи қуйиш шохобчаси фаолиятини кўрсатувчи МЧЖ қўмитага март ойида мурожаат қилиб, “Ҳудудгазтаъминот” АЖ Тошкент вилояти филиали томонидан асоссиз пеня ҳисобланганидан норозилигини билдириб, мазкур масаланинг белгиланган тартибда ҳал этилишида амалий ёрдам кўрсатишни сўраган.
Мурожаат ва унга илова қилинган ҳужжатлар бўйича қўмита томонидан олиб борилган ишлар натижасида тадбиркорлик субъектига асоссиз ҳисобланган 5,3 миллиард сўмлик пеня “Ҳудудгазтаъминот” АЖ томонидан “Ҳудудгазтаъминот корпоратив тизими” электрон дастурида таҳрирлаш йўли орқали чиқарилиши таъминланиб, тадбиркорнинг масаласи ижобий ҳал этилишига эришилган.
Аввалроқ Тошкент вилоятида газ заправка собиқ ҳисобчиси салкам 1 млрд сўмни ўзлаштиргани аниқлангани, Сирдарёдаги метан заправкада салкам 62,5 млрд сўмлик газ ўғирлангани ортидан икки киши ушлангани тўғрисида хабар берилганди.
Изоҳ (0)