Uzbekistan Airports Toshkent xalqaro aeroportining uchib kelish zalida bagaj aravachalari va katta hajmdagi yuklar bilan odamlar to‘planib turgani aks etgan video yuzasidan ma’lumot berdi. Video so‘ngida yo‘lovchilardan biri hushidan ketgani boshqa yo‘lovchilar va aeroport xodimlarini xavotirga solgan.
Ta’kidlanishicha, yo‘lovchilarning to‘planib turishi aeroportda yuklarning kechikishi bilan bog‘liq emas. Istanbul—Toshkent yo‘nalishi bo‘yicha HY-272 reysi Toshkent vaqti bilan soat 19:04 da poytaxt aeroportiga qo‘ngan. Samolyotdan yuklarni tushirish 19:23 da boshlangan. Shunday qilib, bagajlar o‘z vaqtida yo‘lovchilarga yetkazilgan.
Yo‘lovchilarning to‘planib qolishi bagajlar olingach, bojxona nazoratiga o‘tish joyida kuzatilgan. Tegishli xizmatlar maʼlumotlariga ko‘ra, Bojxona qo‘mitasi xodimlari tomonidan fuqarolarga bir necha bor qonun hujjatlari bo‘yicha tushuntirishlar berilganiga qaramay, ko‘p miqdorda yuki bo‘lgan bir necha yo‘lovchilar tijorat maqsadida olib kelingan tovarlarni bojxona nazoratidan o‘tkazish va rasmiylashtirishdan bosh tortgan.
Amaldagi qonunchilikka muvofiq, jismoniy shaxslar tomonidan tadbirkorlik maqsadida tovarlar olib kirilayotganda bojxona rasmiylashtiruvining umumiy qoidalari qo‘llanadi. Tijorat maqsadlari uchun mo‘ljallangan tovarlar yuk bojxona deklaratsiyasi asosida rasmiylashtiriladi va bojxona to‘lovlari belgilangan bojxona stavkalari bo‘yicha undiriladi. Jismoniy shaxslar tomonidan bojxona chegarasi orqali notijorat maqsadlarda olib o‘tiladigan tovarlarga nisbatan soddalashtirilgan bojxona rasmiylashtiruvi qo‘llanadi.
Uchib kelish zalida hushidan ketgan ayolga aeroport tibbiyot xodimlari tomonidan birinchi tibbiy yordam ko‘rsatilgan. Dastlabki xulosaga ko‘ra, ayolning hushdan ketishiga uning sog‘lig‘idagi muammolar sabab bo‘lgan.
Izoh (0)