BMT Inson huquqlari qo‘mitasining 2025–2028-yillar uchun 9 nafar aʼzosini saylash bo‘yicha saylovlar bo‘lib o‘tdi, deb xabar beradi “Dunyo” agentligi.
Qayd etilishicha, saylovda O‘zbekiston bilan birga 16 ta davlat — Burundi, Gruziya, Misr, Hindiston, Ispaniya, Kamerun, Kot-d‘Ivuar, Litva, Marokash, Paragvay, Koreya Respublikasi, Shimoliy Makedoniya, Togo, Xorvatiya, Efiopiya va Janubiy Afrika vakillari 9 ta o‘rin uchun kurash olib borgan.
Yashirin ovoz berish natijalariga ko‘ra, O‘zbekistondan nomzod, Inson huquqlari bo‘yicha Milliy markaz direktori, akademik Akmal Saidov Fuqarolik va siyosiy huquqlar to‘g‘risidagi xalqaro paktga aʼzo mamlakatlardan eng ko‘p ovoz olgan.
Mamlakatimiz vakilining IHQga saylanishi tarixiy voqeadir, chunki O‘zbekiston Markaziy Osiyo davlatlari orasida birinchi marta BMTning ushbu asosiy organiga aʼzo bo‘ldi, — deyiladi xabarda.
Inson huquqlari qo‘mitasi — BMTning mustaqil ekspertlardan iborat organi bo‘lib, aʼzo davlatlar tomonidan Fuqarolik va siyosiy huquqlar to‘g‘risidagi xalqaro paktning bajarilishini monitoring qiladi. Ushbu paktga 173 ta davlat aʼzo. O‘zbekiston ushbu xalqaro hujjatga 1995-yilda qo‘shilgan. Qo‘mita faoliyati insonning barcha fuqarolik va siyosiy huquqlari to‘liq hurmat qilinishini taʼminlashga qaratilgan.
Ma’lumot uchun, Akmal Saidov 1994—1996-yillarda O‘zbekistonning Fransiyadagi favqulodda va muxtor elchisi, shuningdek, O‘zbekistonning UNESCO huzuridagi doimiy vakili sifatida faoliyat ko‘rsatgan. Prezident farmoniga muvofiq, 1996-yil oktyabr oyidan buyon Inson huquqlari bo‘yicha O‘zbekiston Respublikasi Milliy markazi direktori lavozimida ishlab kelmoqda.
Izoh (0)