Toshkent shahar Mirobod tumani sudi o‘zbekistonlik fuqaroni Rossiyada bo‘lib turgan davrida O‘zbekistonda ichki ishlar organlari xodimlarining qonuniy talabiga bo‘ysunmaslikda ayblab, 15 sutkaga qamash haqida qaror chiqardi. Bu haqda “Ezgulik” jamiyati raisi Abdurahmon Tashanov ma’lum qildi.
Abdurahmon Tashanov sud qarori va fuqaro pasportiga viza muhri urilgani aks etgan suratlarni ham ilova qildi. Uning aytishicha, aybdor deb topilgan fuqaro 20-martdan 25-aprelgacha oilasi bilan Rossiyada bo‘lgan. Sud hujjatida esa huquqbuzarlik 16-aprelda sodir etilgani ko‘rsatilgan.
Bu xabar ijtimoiy tarmoqlarda muhokamalarga sabab bo‘lgach, Sudyalar oliy kengashi matbuot xizmati holatga izoh berdi.
Unda aytilishicha, 17-may kuni jinoyat ishlari bo‘yicha Mirobod tuman sudida U.R.ga doir ma’muriy huquqbuzarlikka oid ish ko‘rib chiqilib, tegishli jazo tayinlangan. Sud qarorida huquqbuzarlik sodir etilgan sana 16-aprel deya qayd etilgan bo‘lsa-da, mazkur holat texnik xatolik bo‘lib, sudya tomonidan o‘sha vaqtning o‘zida qo‘shimcha qaror chiqarish yo‘li bilan bartaraf etilgan.
16-may kuni sodir etilgan ushbu ma’muriy huquqbuzarlikka doir ish materiallari 17-may kuni sudga kelib tushgan bo‘lib, elektron taqsimotga ko‘ra, sudya S. Xo‘jamqulova ish yurituviga olingan. Mazkur jarayon to‘liq raqamlashtirilgan bo‘lib, ushbu dasturga inson omilining ta’siri yo‘q.
“Alohida ta’kidlash shartki, ushbu bayonot sud qarori qonuniyligi yuzasidan Kengash xulosasi sifatida talqin qilinmasligi kerak. Chunki, qonunga ko‘ra, sud qarorlariga huquqiy baho berish yuqori sud instansiyasi vakolatiga taalluqli”, — deyiladi xabarda.
Kengash sud qarori qonuniy kuchda ekani va texnik xatolik bartaraf etilgani bois sudyaga nisbatan xizmat tekshiruvi o‘tkazishga yetarlicha asos yo‘q deb hisoblaydi. Biroq mavjud holat jamoatchilikda sud hokimiyatiga nisbatan noto‘g‘ri tasavvurlar paydo qilishi ehtimolini yuzaga keltirgani e’tiboridan Toshkent shahar sudiga uning sabablarini o‘rganishni tavsiya qildi.
Izoh (0)