O‘zbekistonda sog‘lom turmush tarzini rag‘batlantirishga alohida e’tibor qaratiladi

Prezident yordamchisi Saida Mirziyoyeva O‘zbekistonda sog‘lom turmush tarzini rag‘batlantirishga alohida e’tibor qaratilishini ma’lum qildi.

Shavkat Mirziyoyev 21-may kuni Sog‘liqni saqlash loyihalari markazi tomonidan amalga oshirilayotgan ishlar va yangi takliflar taqdimoti bilan tanishgandi. Unda ishtirok etgan Saida Mirziyoyeva prezident tomonidan sog‘liqni saqlash tizimiga oid bir necha muhim qarorlar qabul qilinganini qayd etdi.

Uning ta’kidlashicha, bu masalalar anchadan beri muhokamalarga sabab bo‘layotgan edi.

Xususan, 2024-yilda Toshkentda davlat tibbiy sug‘urtalash mexanizmi ishga tushadi. Bu har bir fuqaroga turli holatlarda tibbiy yordam olish imkonini beradi. Davlat tomonidan elektron retseptlar orqali aholini dori-darmon vositalari bilan ta’minlash dasturi yaratiladi. Fuqarolarga byudjet hisobidan bepul dorilar beriladi.

“Bu xarajatlarni optimallashtirib, tibbiy xodimlarning ishini yengillatish imkonini beradi. Natijada mablag‘larni sarflash samaradorligi oshadi”, — deydi Saida Mirziyoyeva.

Shuningdek, murojaatlarni kasallikning og‘irlik darajasiga qarab saralovchi tez tibbiy yordam tizimini joriy etish orqali tibbiy xizmat ko‘rsatish samaradorligi va tezkorligi takomillashtiriladi.

Bundan tashqari, sog‘lom turmush tarzini rag‘batlantirishga alohida e’tibor qaratiladi.

“Bu har bir inson birinchi navbatda o‘z salomatligi haqida qayg‘uradigan jamiyat tomon qo‘yiladigan muhim qadamdir”, — dedi prezident maslahatchisi.

Shavkat Mirziyoyev aholi o‘rtasida mustahkam salomatlik garovi bo‘lgan sog‘lom turmush tarzini shakllantirish, jismoniy tarbiya va sportni rivojlantirishga alohida e’tibor qaratilishini aytgandi. 

Prezidentning “Sog‘liqni saqlash vazirligi faoliyatini yanada takomillashtirish chora-tadbirlari to‘g‘risida”gi farmonida 2024—2026-yillarda sog‘lom turmush tarzini shakllantirish, to‘g‘ri ovqatlanishni tizimli targ‘ib qilish va ommalashtirish dasturi ishlab chiqilishi lozimligi belgilangandi.