Respublika “Ma’naviyat va ma’rifat” markazi hamda O‘zbekiston mahallalar uyushmasi BYD HAN rusumli transport vositasini xarid qilgani haqida “Revizor” Telegram kanali yozgan edi.
Xabarda 603 million 184 ming so‘mga Respublika “Ma’naviyat va ma’rifat” markazi hamda O‘zbekiston mahallalar uyushmasi BYD HAN transport vositasini xarid qilayotgani aytilgan. Shuningdek, O‘zbekiston mahallalar uyushmasining 630 million so‘mga yana bir dona BYD HAN avtomobilini yuqoriroq narxda boshqa avtosalondan xarid qilayotgani qo‘shimcha qilingan.
Holat yuzasidan Korrupsiyaga qarshi kurashish agentligi axborot xizmati “Daryo”ga izoh berdi.
Aniqlanishicha, prezidentning 2017-yil 28-iyuldagi “Ma’naviy-ma’rifiy ishlar samaradorligini oshirish va sohani rivojlantirishni yangi bosqichga ko‘tarish to‘g‘risida”gi qarorining 7-bandi 2-xatboshida Respublika “Ma’naviyat va ma’rifat markazi” rahbari maqomi, maishiy ta’minoti, tibbiy va transport xizmatidan foydalanish shart-sharoitlariga ko‘ra vazirga, markaz rahbarining birinchi o‘rinbosari va o‘rinbosari tegishli ravishda vazirning birinchi o‘rinbosar va o‘rinbosariga tenglashtirilishi belgilab qo‘yilgan.
Vazirlar Mahkamasining 2021-yil 29-apreldagi “Davlat boshqaruvi va mahalliy davlat hokimiyati organlarida xizmat avtotransport vositalaridan foydalanish tizimini tubdan takomillashtirish chora-tadbirlari to‘g‘risida”gi qarorining 1-ilovasiga muvofiq, vazirliklar va davlat qo‘mitalari rahbarlariga bazaviy hisoblash miqdorining 2000 baravari (680 million so‘m) gacha bo‘lgan qiymatdagi xizmat avtotransport vositasini biriktirish mumkinligi belgilangan.
Yuqoridagilarga ko‘ra, Respublika “Ma’naviyat va ma’rifat markazi” 603 mln 184 ming so‘mga bir dona qora rangli BYD HAN rusumli transport vositasini xarid qilganligi bo‘yicha qonunbuzilishi holatlari aniqlanmagan.
Izoh (0)