Тошкент шаҳар Миробод тумани суди ўзбекистонлик фуқарони Россияда бўлиб турган даврида Ўзбекистонда ички ишлар органлари ходимларининг қонуний талабига бўйсунмасликда айблаб, 15 суткага қамаш ҳақида қарор чиқарди. Бу ҳақда “Эзгулик” жамияти раиси Абдураҳмон Ташанов маълум қилди.
Абдураҳмон Ташанов суд қарори ва фуқаро паспортига виза муҳри урилгани акс этган суратларни ҳам илова қилди. Унинг айтишича, айбдор деб топилган фуқаро 20 мартдан 25 апрелгача оиласи билан Россияда бўлган. Суд ҳужжатида эса ҳуқуқбузарлик 16 апрелда содир этилгани кўрсатилган.
Бу хабар ижтимоий тармоқларда муҳокамаларга сабаб бўлгач, Судьялар олий кенгаши матбуот хизмати ҳолатга изоҳ берди.
Унда айтилишича, 17 май куни жиноят ишлари бўйича Миробод туман судида У.Р.га доир маъмурий ҳуқуқбузарликка оид иш кўриб чиқилиб, тегишли жазо тайинланган. Суд қарорида ҳуқуқбузарлик содир этилган сана 16 апрель дея қайд этилган бўлса-да, мазкур ҳолат техник хатолик бўлиб, судья томонидан ўша вақтнинг ўзида қўшимча қарор чиқариш йўли билан бартараф этилган.
16 май куни содир этилган ушбу маъмурий ҳуқуқбузарликка доир иш материаллари 17 май куни судга келиб тушган бўлиб, электрон тақсимотга кўра, судья С. Хўжамқулова иш юритувига олинган. Мазкур жараён тўлиқ рақамлаштирилган бўлиб, ушбу дастурга инсон омилининг таъсири йўқ.
“Алоҳида таъкидлаш шартки, ушбу баёнот суд қарори қонунийлиги юзасидан Кенгаш хулосаси сифатида талқин қилинмаслиги керак. Чунки, қонунга кўра, суд қарорларига ҳуқуқий баҳо бериш юқори суд инстанцияси ваколатига тааллуқли”, — дейилади хабарда.
Кенгаш суд қарори қонуний кучда экани ва техник хатолик бартараф этилгани боис судьяга нисбатан хизмат текшируви ўтказишга етарлича асос йўқ деб ҳисоблайди. Бироқ мавжуд ҳолат жамоатчиликда суд ҳокимиятига нисбатан нотўғри тасаввурлар пайдо қилиши эҳтимолини юзага келтиргани эътиборидан Тошкент шаҳар судига унинг сабабларини ўрганишни тавсия қилди.
Изоҳ (0)