Samarqand tumanida qalbaki aksiz markali alkogol va tamaki mahsulotlari savdosiga chek qo‘yildi, deb xabar beradi Bosh prokuratura huzuridagi departament.
Qayd etilishicha, departamentning Samarqand shahar bo‘limi va IIB xodimlari hamkorligida Samarqand tumanidagi “Parrandachilik” MFY hududidagi “O.” MCHJga qarashli savdo do‘konda tezkor tadbir o‘tkazilgan. Tadbirda korxona rahbari R.N. hech qanday hujjatlari bo‘lmagan umumiy bahosi 197,5 million so‘mlik 68 turdagi jami 6 545 dona alkogol mahsuloti hamda 18 turdagi jami 2 390 quti tamaki mahsulotini sotuvga qo‘yganligi aniqlanib, ushbu mahsulotlar ashyoviy dalil sifatida olingan.
Mazkur holat yuzasidan Jinoyat kodeksning 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)