Toshkent shahar bojxona boshqarmasining “Toshkent tovar” tashqi iqtisodiy faoliyat bojxona postida yonilg‘i tashish mashinasini hujjatlarda “og‘irlashtirish” orqali 791 million so‘mlik bojxona imtiyozlarini o‘zlashtirishga urinish fosh qilindi. Bu haqda Bojxona qo‘mitasi matbuot xizmati xabar berdi.
Qayd etilishicha, avtotransport vositalarining ruxsat etilgan massalariga ko‘ra, ikki o‘qli transport vositasiga tushuvchi og‘irlik 18 tonna qilib belgilangan. Ammo ushbu holatdagi transport vositasi ikki o‘qli bo‘lsa-da, hujjatlarda uning yuk ko‘tarish qobiliyati to‘la vazni bilan hisoblaganda 20 tonna 640 kilogramm deb ko‘rsatilgan.
Amaldagi tartiblarga ko‘ra, ishlab chiqarilganiga 7 yildan oshmagan, yuk bilan hisoblaganda to‘liq vazni 20 tonnadan oshadigan maxsus va yuk transport vositalari 2025-yil 1-yanvarga qadar bojxona to‘lovlaridan ozod etilgan.
Ayni shu imtiyozdan foydalanish orqali mazkur transport vositasi egasi ham davlat byudjetiga undirilishi lozim bo‘lgan 791 million so‘mlik bojxona to‘lovlarini tejab qolmoqchi bo‘lgan.
Bojxona ko‘rigi davomida transport vositasiga mazkur bojxona imtiyozlarini qo‘llab bo‘lmasligi aniqlangan va buni Xadicha Sulaymonova nomidagi respublika sud ekspertizasi markazi ekspertlari ham tasdiqlagan.
Holat yuzasidan Maʼmuriy javobgarlik to‘g‘risidagi kodeksning 227-moddasida (bojxona nazorati zonasi rejimining buzilishi) nazarda tutilgan huquqbuzarlik alomatlari bilan tegishli protsessual hujjatlar rasmiylashtirilgan hamda surishtiruv harakatlari davom ettirilmoqda.
Izoh (0)