Eron prezidenti vafoti munosabati bilan 8 ta davlatda motam e’lon qilindi

Dunyoning kamida sakkiz davlatida Eron prezidenti Ibrohim Raisiy va unga hamrohlik qilayotgan delegatsiyaning vertolyot halokatida vafot etgani munosabati bilan motam e’lon qildi. Bu haqda “TASS” xabar berdi.

Erondan tashqari bu davlatlar qatoriga Hindiston, Iroq, Livan, Pokiston, Suriya, Turkiya va Tojikiston kirgan. 

Ko‘pchilik mamlakatlarda bir kunlik motam eʼlon qilingan, faqat Suriya va Livanda u uch kun, Tojikistonda esa ikki kun. Eron Islom respublikasida motam tadbirlari besh kun davom etadi, — deyiladi xabarda.

O‘z navbatida, Tojikistonda mamlakatdagi barcha davlatga qarashli televideniye va radioda ikki kun davomida ko‘ngilochar ko‘rsatuvlar bermaslik yuzasidan ko‘rsatmalar berilgan. Tegishli qaror respublika Radio va televideniye qo‘mitasi tomonidan qabul qilindi, deb xabar berdi boshqarma raisi Nuriddin Said.

Bu Tojikiston hukumati va xalqining do‘st Eron xalqiga hamdardlik belgisidir, — dedi u.

Tojikistonda motam e’lon qilingani haqida rasmiy xabar berilmagan. Avvalroq Tojikiston prezidenti Emomali Rahmon eronlik hamkasbi vafoti munosabati bilan Eron oliy rahnamosi Oyatulloh Xomanaiyga hamdardlik telegrammasi yo‘llagandi.

Biz atoqli davlat arbobi Sayidibrohim Raisiy shaxsiga hurmat bajo keltiramiz va uning Tojikiston-Eron do‘stlik va o‘zaro manfaatli hamkorlik munosabatlarini har tomonlama rivojlantirish, hududiy va xalqaro muammolarni hal etishdagi ijodiy hissasini yuksak qadrlaymiz. Ushbu motam munosabati bilan sizga, do‘st va qardosh Eron xalqiga, qurbonlarning oila a’zolari va yaqinlariga samimiy hamdardlik izhor etaman. Ushbu kunda biz Eron va uning xalqi bilan birgamiz, — deyiladi xabarda.

Raisiy vafoti munosabati bilan Turkiya prezidenti Rajab Toyyib Erdo‘g‘on xalqqa murojaat qildi. U “Eron xalqining dardiga sherik bo‘lish” uchun mamlakatda bir kunlik motam e’lon qilgan.

Eslatib o‘tamiz, 19-may kuni Eron prezidenti Ibrohim Raisiy aviahalokat natijasida halok bo‘ldi. Mamlakat shimoli-g‘arbida Eron prezidenti va tashqi ishlar vaziri bo‘lgan vertolyot halokatga uchragandi.

Kuchli tuman va tog‘li hudud tufayli halokatga uchragan vertolyotni qidirish 10 soatdan ortiq davom etgan. Mutaxassislar fikricha, falokat texnik nosozlik yoki inson omili tufayli yuz bergan bo‘lishi mumkin. Raisiy vafoti munosabati bilan Eronda besh kunlik motam e’lon qilingan. Eron prezidentining dafn marosimi 23-may kuni Mashhad shahrida bo‘lib o‘tadi. Muddatidan oldin prezidentlik saylovlari 28-iyunga belgilangan.