Eron prezidenti Ibrohim Raisiy 19-may kuni aviahalokatda halok bo‘lgani sabab uning vakolatlari birinchi o‘rinbosari, vitse-prezident Muhammad Moxberga o‘tadi.
“Prezident vafot etgan, ishdan bo‘shatilgan, iste’foga chiqqan, ikki oydan ortiq muddat davomida ishda bo‘lmagan yoki kasal bo‘lgan taqdirda yoki prezidentlik muddati tugagan va yangi prezident haligacha saylanmagan taqdirda birinchi vitse-prezident rahbariyatning roziligi bilan uning vakolatlari va vazifalarini bajarishga kirishadi”, deyiladi Eron Konstitutsiyasining 131-moddasida.
Majlis spikeri, sud hokimiyati rahbari va birinchi vitse-prezidentdan iborat kengash 50 kun ichida prezident saylovini tashkil qilishi kerak.
2021-yildan beri Eron vitse-prezidenti lavozimini Muhammad Moxber egallab keladi. Bungacha u 2007-yildan Eronning sobiq oliy rahnamosi Oyatulloh Ruhulloh Humayniyning buyruqlarini bajarish shtabiga rahbarlik qilgan.
Raisiy vertolyoti halokatga uchrashi
Bortida Eron prezidenti bo‘lgan vertolyot 19-may kuni Eron-Ozarbayjon chegarasi yaqinidagi Verzegan shahri tog‘li hududiga “qattiq qo‘ngan”di. Qutqaruvchilar 20-may kuni vertolyot halokatga uchragan joyni aniqlagan. Vertolyot “qattiq qo‘nish” chog‘ida butunlay yonib ketgan. Oqibatda bortdagilarning bari halok bo‘lgan. Ular qatorida Raisiydan tashqari Eron tashqi ishlar vaziri Amir Abdullahyon, Sharqiy Ozarbayjon gubernatori Oyatulloh al-Hoshim va Tabriz imomi Muhammad Ali al-Hoshim ham bor.
Ibrohim Raisiy Ozarbayjon rahbari Ilhom Aliyev bilan uchrashuvdan qaytayotgan bo‘lgan. Davlat rahbarlari Aras daryosidagi to‘g‘on ochilishi marosimida ishtirok etgan.
- Ibrohim Raisi 2021-yilda Eron prezidenti etib saylangandi. Eronning 63 yoshli prezidenti o‘z faoliyatini yuridik sohada boshlagan – u mamlakatning turli hududlarida prokuror lavozimlarida ishlagan.
- Raisiy 2014-yil mamlakat bosh prokurori lavozimini egallagan, 2017-yil Eron prezidentligiga nomzod bo‘lgan, ammo Hasan Ruhoniyga yutqazgan. 2021-yilgi saylovlarda 60 foizdan ortiq ovoz bilan g‘alaba qozongan. Ibrohim Raisiy har doim tashqi siyosatda Isroilni asosiy dushman deb bilgan va unga qarshi bayonotlar bergan. Prezident AQSH va Yevropa Ittifoqi sanksiyalari ostida bo‘lgan.
Eron prezidenti Ibrohim Raisiy 9-noyabr kuni rafiqasi Jamile Alamolxoda hamrohligida Toshkentga kelgandi. Shu kuni Shavkat Mirziyoyevning Eron prezidenti Ibrohim Raisiy bilan uchrashuvi bo‘lib o‘tgan. Unda O‘zbekiston—Eron munosabatlarini yanada mustahkamlash, savdo, investitsiyalar, innovatsiyalar va transport sohalarida amaliy hamkorlikni kengaytirish masalalari muhokama qilingan. O‘zaro muloqotlar faol davom etayotgani mamnuniyat bilan qayd etilgandi.
Izoh (0)