Shavkat Mirziyoyev Eron shimolida yuz bergan fojia oqibatida Eron prezidenti Ibrohim Raisiy va unga hamrohlik qilgan shaxslar vafot etgani munosabati bilan ushbu mamlakat oliy diniy rahbari Oyatulloh Xomanaiyga hamdardlik bildirdi.
Prezident matbuot kotibining xabar qilishicha, maktubda O‘zbekiston va Eron o‘rtasidagi keng qamrovli hamkorlikni, o‘zaro manfaatli va uzoq muddatli sheriklik munosabatlarini rivojlantirishga ulkan hissa qo‘shgan Ibrohim Raisiyning yorqin xotirasi xalqlarimiz qalbida doimiy saqlanib qolishi ta’kidlanadi.
Davlat rahbari do‘st Eron xalqiga, marhumlarning oila a’zolari va yaqinlariga chuqur ta’ziya izhor etdi.
19-may kuni Eron prezidenti Ibrohim Raisiy bo‘lgan vertolyot Eron-Ozarbayjon chegarasi yaqinidagi Verzegan shahri yaqinidagi tog‘li hududda halokatga uchradi. Bortda prezidentdan tashqari Eron tashqi ishlar vaziri Amir Abdullahyon va Sharqiy Ozarbayjon gubernatori Oyatulloh al-Hoshim bo‘lgan. 20-may kuni qutqaruvchilar vertolyot halokatga uchragan joyni aniqladi. Eron rasmiysi Reuters agentligiga vertolyot qattiq qo‘nish chog‘ida butunlay yonib ketganini ma’lum qildi.
Eronning 63 yoshli prezidenti Ibrohim Raisiy ushbu davlatga 2021-yildan buyon rahbarlik qilayotgandi. U O‘zbekistonga so‘nggi marta 2023-yil 9-noyabr kuni rafiqasi Jamile Alamolxoda hamrohligida kelgandi. Shu kuni Shavkat Mirziyoyevning Eron prezidenti Ibrohim Raisiy bilan uchrashuvi bo‘lib o‘tgan. Unda O‘zbekiston—Eron munosabatlarini yanada mustahkamlash, savdo, investitsiyalar, innovatsiyalar va transport sohalarida amaliy hamkorlikni kengaytirish masalalari muhokama qilingan. O‘zaro muloqotlar faol davom etayotgani mamnuniyat bilan qayd etilgandi.
Izoh (0)