Eron prezidenti Ibrohim Raisiyning o‘limi Eron oliy rahnamosi Oyatulloh Ali Xomanaiyning o‘g‘lini otasining asosiy vorisiga aylantirdi. Bu haqda Politico xabar berdi.
Raisiyning mamlakat rahbariyatiga sodiqligi tufayli so‘nggi yillarda u Eron oliy rahnamosi sifatida Xomanaiy o‘rnini egallashi kutilayotgandi. Biroq prezidentning o‘limi tufayli Xomanaiy lavozimiga asosiy nomzod sifatida uning o‘g‘li Mojtaba ko‘rilmoqda.
Vashingtondagi Demokratiyani himoya qilish fondi ilmiy xodimi Behnam Ben Talebluga ko‘ra, Xomanaiy marhum prezidentni davlat yetakchisi sifatida ko‘rishni istagan odam edi.
“Endilikda uning o‘limi tufayli mamlakatda va xorijda ko‘pchilik Xomanaiy lavozimiga asosiy nomzod sifatida uning o‘g‘li Mojtaba bo‘lishi mumkinligiga ishonmoqda. Raisiyning o‘limi voris tanlash jarayonini qisqartiradi. Eron oliy rahnamosining o‘g‘li potensial nomzodlardan biri”, — deya qo‘shimcha qildi Ben Taleblu.
Raisiy vertolyoti halokatga uchrashi
Bortida Eron prezidenti bo‘lgan vertolyot 19-may kuni Eron-Ozarbayjon chegarasi yaqinidagi Verzegan shahri tog‘li hududiga “qattiq qo‘ngan”di. Qutqaruvchilar 20-may kuni vertolyot halokatga uchragan joyni aniqlagan. Vertolyot “qattiq qo‘nish” chog‘ida butunlay yonib ketgan. Oqibatda bortdagilarning bari halok bo‘lgan. Ular qatorida Raisiydan tashqari, Eron tashqi ishlar vaziri Amir Abdullahyon, Sharqiy Ozarbayjon gubernatori Oyatulloh al-Hoshim va Tabriz imomi Muhammad Ali al-Hoshim ham bor.
Ibrohim Raisiy Ozarbayjon rahbari Ilhom Aliyev bilan uchrashuvdan qaytayotgan bo‘lgan. Davlat rahbarlari Aras daryosidagi to‘g‘on ochilishi marosimida ishtirok etgan.
Izoh (0)