Tojikiston Milliy xavfsizlik davlat qo‘mitasi chegara qo‘shinlari fuqarolarning chegara zonasida bo‘lishi, kirishi va chiqishi ustidan qatʼiy nazorat o‘rnatilishini ma’lum qildi. Bu haqda “Xovar” xabar berdi.
Milliy xavfsizlik davlat qo‘mitasi maʼlumotlariga ko‘ra, chet el fuqarolari va fuqaroligi bo‘lmagan shaxslarning chegara zonasiga Tashqi ishlar vazirligi va ichki ishlar organlari ruxsatisiz kirishi qatʼiyan man etiladi. Chegara postlari fuqarolarning chegara hududlariga kirishi va chiqishi ustidan tegishli nazoratni amalga oshiradi.
Mintaqa va jahonda vaziyatni murakkablashtirish tendensiyasi, terroristik va ekstremistik tashkilotlarning davlat chegaralarini noqonuniy kesib o‘tishga, yer sayyorasining turli nuqtalarida, jumladan, Tojikistonda g‘ayriinsoniy terrorchilik harakatlarini amalga oshirishga urinishlar mamlakatimiz hududi xavfsizligi va himoyasini kuchaytirishni, barqarorlik, osoyishtalik, shuningdek, aholining tinch-totuv yashashini ta’minlashni taqozo etmoqda, — deyiladi Milliy xavfsizlik davlat qo‘mitasi bayonotida.
Tojikistonda bo‘lgan yoki mamlakatga kelayotgan barcha fuqarolar hamda mehmonlardan Tog‘li Badaxshon avtonom viloyati va Xatlon viloyatining chegaradosh hududlariga sayohat qilishda pasport va boshqa shaxsni tasdiqlovchi hujjatlarni olib yurish tavsiya etiladi.
Ushbu hududlarga sanab o‘tilgan talablarga rioya qilmasdan kirishga yo‘l qo‘yilmaydi, — deyiladi xabarda.
Izoh (0)