Тожикистон Миллий хавфсизлик давлат қўмитаси чегара қўшинлари фуқароларнинг чегара зонасида бўлиши, кириши ва чиқиши устидан қатъий назорат ўрнатилишини маълум қилди. Бу ҳақда “Ховар” хабар берди.
Миллий хавфсизлик давлат қўмитаси маълумотларига кўра, чет эл фуқаролари ва фуқаролиги бўлмаган шахсларнинг чегара зонасига Ташқи ишлар вазирлиги ва ички ишлар органлари рухсатисиз кириши қатъиян ман этилади. Чегара постлари фуқароларнинг чегара ҳудудларига кириши ва чиқиши устидан тегишли назоратни амалга оширади.
Минтақа ва жаҳонда вазиятни мураккаблаштириш тенденцияси, террористик ва экстремистик ташкилотларнинг давлат чегараларини ноқонуний кесиб ўтишга, ер сайёрасининг турли нуқталарида, жумладан, Тожикистонда ғайриинсоний террорчилик ҳаракатларини амалга оширишга уринишлар мамлакатимиз ҳудуди хавфсизлиги ва ҳимоясини кучайтиришни, барқарорлик, осойишталик, шунингдек, аҳолининг тинч-тотув яшашини таъминлашни тақозо этмоқда, — дейилади Миллий хавфсизлик давлат қўмитаси баёнотида.
Тожикистонда бўлган ёки мамлакатга келаётган барча фуқаролар ҳамда меҳмонлардан Тоғли Бадахшон автоном вилояти ва Хатлон вилоятининг чегарадош ҳудудларига саёҳат қилишда паспорт ва бошқа шахсни тасдиқловчи ҳужжатларни олиб юриш тавсия этилади.
Ушбу ҳудудларга санаб ўтилган талабларга риоя қилмасдан киришга йўл қўйилмайди, — дейилади хабарда.
Изоҳ (0)