AQSH rasmiylari Rossiya va Xitoy xalqaro tartibni buzishga intilayotganiga ishonchi komil, dedi Milliy xavfsizlik kengashining strategik aloqalar bo‘yicha koordinatori Jon Kirbi. Uning so‘zlariga ko‘ra, Vashington Moskva va Pekin munosabatlarining mustahkamlanishidan xavotirda.
Jon Kirbining ta’kidlashicha, ushbu davlatlar “Qo‘shma Shtatlarga foyda keltiradigan ittifoqchilar va hamkorliklar tarmog‘iga qarshi chiqishga” intilmoqda. Uning fikricha, Rossiya Federatsiyasi va Xitoy “milliy xavfsizlik sohasida bir-birining manfaatlarini mustahkamlash yo‘llarini izlamoqchi”.
“Bu ikki davlat va ularning rahbarlari butun dunyo bo‘ylab bizning milliy xavfsizlik manfaatlarimizga zid bo‘lgan harakatlarni amalga oshirmoqda. Bu harakatlar ko‘plab ittifoqchilarimiz va hamkorlarimiz manfaatlariga ham ziddir. Bu ikki yetakchi rivojlanayotgan munosabatlarni mustahkamlashga harakat qilishda davom etishsa ajab emas”, — dedi Jon Kirbi brifingda.
Rossiya prezidenti Vladimir Putin shu hafta Xitoyga ikki kunlik tashrif bilan keldi. U Xitoy rahbari Si Szinpin bilan ham uchrashdi. Ular Ukrainadagi vaziyatni yuzma-yuz muhokama qilishdi, shuningdek, Shveysariyada 15—16-iyun kunlari bo‘lib o‘tishi rejalashtirilgan tinchlik konferensiyasi haqida fikr almashishdi. Mazkur tadbirga Rossiya taklif qilinmagan, Xitoy rahbarining ishtirok etishi esa hozircha noma’lum.
Izoh (0)