AQSH prezidentining xavfsizlik bo‘yicha maslahatchisi Jeyk Sallivan G‘azoda o‘t ochishni to‘xtatish borasidagi muzokaralarni davom ettirish uchun Saudiya Arabistoni va Isroilga boradi. Bu haqda CNN nashri xabar berdi.
Manbalar o‘t ochishni to‘xtatish bo‘yicha to‘xtab qolgan muzokaralar davom ettirilishini bildirgan. Bu borada Saudiya Arabistoni va Isroil oliy rahbariyati bilan yuqori darajadagi uchrashuvlar tashkil etilishi belgilangan.
Oldinroq AQSH rasmiylari Isroil qo‘shinlarining G‘azo janubida yalpi amaliyot boshlagani dalilini ko‘rmaganliklarini maʼlum qilishgan edi. Prezident Bayden agar Isroil shunday ishga qo‘l ursa, AQSH o‘z ittifoqchisiga qo‘shimcha hujum qurollari yetkazib berishni to‘xtatib qo‘yishi haqida ogohlantirgan.
Isroil rasmiylari amerikalik hamkasblariga ikki tomon o‘rtasida batafsil muloqot bo‘lmaguncha Rafahda yirik harbiy operatsiya o‘tkazmasliklarini maʼlum qilishgan. Biroq hozirda G‘azo janubida amalga oshirilayotgan harakatlar buning aksini ko‘rsatmoqda.
Vashington Jeyk Sallivanning safari tafsilotlari va rejasini oshkor qilmagan. Biroq Yaqin Sharqqa tashrif davomida Sallivan Saudiya va Isroil munosabatlarini normallashtirish borasida muzokaralar ham olib borishi taxmin qilingan.
Izoh (0)