O‘zbekiston fuqarolari Rossiyaga kiritilmayotgani haqida xabarlar tarqalgandi. Tashqi mehnat migratsiyasi agentligining Rossiyadagi vakolatxonasi buni rad etdi.
Ma’lum qilinishicha, bunga aniqlik kiritish maqsadida Moskva shahridagi barcha aeroportlarning mas’ul xodimlari bilan bog‘lanilgan. Natijada Moskva shahridagi “Domodedovo”, “Vnukova”, “Sheremetyevo” aeroportlarda O‘zbekiston fuqarolarining Rossiya hududiga qo‘yilmayotgani yoki uzoq vaqt davomida ushlab turish holatlari kuzatilmayotgani aniqlangan.
Bundan tashqari, avtomashinalar orqali Rossiyaga kirishdagi Orenburg, Samara, Saratov viloyatlaridagi “Ozinki”, “Mashtakovo”, “Sagarchin” bojxona chegara postlaridagi holatlar ham o‘rganilganda, ushbu chegara postlari doimiy ish tartibida ishlayotgani, O‘zbekiston fuqarolari biron-bir to‘siqlarsiz Rossiya hududiga kirayotgani ma’lum bo‘lgan.
Moskva viloyatidagi Crocus City Hall’da yuz bergan teraktdan so‘ng Tojikiston fuqarolari Rossiya davlat chegarasini kesib o‘tishda qiyinchiliklarga duch kelgandi. Qirg‘iziston va O‘zbekiston fuqarolari ham Rossiyaga kiritilmayotgani haqidagi xabarlar Markaziy Osiyodan kelgan muhojirlar masalalari bilan shug‘ullanuvchi huquq himoyachisi Valentina Chupik tomonidan tarqatilgan.
Izoh (0)