Qirg‘iziston Tashqi ishlar vazirligi fuqarolarga Rossiyaga borishdan vaqtincha voz kechishni tavsiya qildi. Bu haqda Qirg‘iziston tashqi ishlar vazirligi saytidagi xabarda aytiladi.
“Vazirlik Rossiya Federatsiyasiga borish uchun uzrli sabablari bo‘lmagan vatandoshlarga avval joriy etilgan qo‘shimcha xavfsizlik choralari va davlat chegarasi orqali kirishda kuchaytirilgan nazorat rejimi bekor qilinmaguncha, Rossiya Federatsiyasi hududiga borishdan vaqtincha voz kechishni tavsiya qiladi. Agar Rossiyaga boradigan bo‘lsangiz, sizda mamlakatga kirish uchun cheklovlar bor yoki yo‘qligini oldindan tekshirib olishingiz kerak”, deyiladi xabarda.
Aprel oyi boshida Qirg‘iziston tashqi ishlar vaziri o‘rinbosari Almaz Imangaziev Crocus City Hall’dagi teraktdan keyin 70 ga yaqin mamlakat fuqarosi Rossiya hududiga kiritilmaganini ma’lum qilgan edi.
25-mart kuni ham Qirg‘iziston Tashqi ishlar vazirligi vatandoshlariga uzrli sabablarsiz Rossiyaga borishdan vaqtincha bosh tortishni tavsiya qilgandi.
Izoh (0)