Buyuk Britaniya tashqi ishlar vaziri, hamdo‘stlik va taraqqiyot masalalari bo‘yicha davlat kotibi Devid Kemeron O‘zbekistonga tashrif buyurdi. “Gazeta.uz” uning fikrlari bilan bo‘lishdi.
Britaniya tashqi ishlar vaziri O‘zbekiston, Turkmaniston, Qozog‘iston va Mo‘g‘ulistonga safar uyushtirdi. Diplomat 22-aprel kuni Tojikistonda bo‘lgan. Tashrif maqsadi savdo, xavfsizlik, atrof-muhit hamda ta’lim bo‘yicha aloqalarni kengaytirishdan iborat.
U Markaziy Osiyoning barcha beshta davlatiga tashrif buyurayotgan ilk Buyuk Britaniya tashqi ishlar vaziri ekani, G7 davlatlaridagi hamkasblari orasida bunday miqyosdagi tashrifni amalga oshirganlar ko‘p emasligini qayd etgan.
O‘ziga xos noyob merosga ega ushbu mintaqa xalqlari hozir ham jadal o‘zgarishlarni boshdan kechirishda davom etmoqda. Ular o‘z suvereniteti himoya qilinishini va chegaralari daxlsizligi hurmat qilinishini istaydigan mustaqil davlatlardir. Men ularning har biri bilan barchamizga foyda keltiradigan yanada mustahkam hamkorlik o‘rnatishni istayman, — deydi Kemeron.
Britaniyalik vazir hamkorlik doirasida ko‘plab yutuqlarga erishilgani, xususan, o‘tgan yilning o‘zida Markaziy Osiyodan Buyuk Britaniyaga maxsus dastur bo‘yicha ishlash uchun o‘n minglab mavsumiy ishchilar borgani, Uzbekistan Airways har hafta Londonga bir nechta reyslarni amalga oshirishiga to‘xtalib o‘tgan.
Kemeron oldinga qadam tashlash vaqti kelganini ta’kidlagan.
Biz xavf va noaniqlik kuchaygan bir davrda yashayapmiz. Katta geosiyosiy raqobatlar dunyoning ushbu qismidagi mamlakatlar uchun ma’lum bir muammolarni keltirib chiqaradi. Global texnologik va iqtisodiy o‘zgarishlar esa barchamizdan yoshlarimizning farovonligi uchun ularni kerakli ko‘nikmalar bilan ta’minlashimizni talab qilmoqda, — deya qo‘shimcha qilgan Kemeron.
Britaniyalik diplomat mintaqadagi rivojlanish dasturlarini uch barobarga oshirilishini e’lon qildi. Uning ta’kidlashicha, bundan maqsad — birgalikda fuqarolar uchun xavfsizroq va yaxshiroq sharoitlar yaratishdir. Kemeron o‘zaro munosabatlarni yangi darajaga olib chiqish uchun uchta ustuvor yo‘nalish haqida gapirar ekan, birinchi bo‘lib global tartibga urg‘u berdi. U butun dunyoda ushbu tamoyillarni himoya qilish uchun birgalikda ishlashga chaqirdi.
Ikkinchi yo‘nalish – iqtisodiy hamkorlik, — deydi Kemeron.
U Buyuk Britaniya kam uglerodli, energiya tejamkorligi balandroq iqtisodiyotlar uchun zarur bo‘lgan texnologiya va sarmoyalarni jalb qilishda yordam berishi mumkinligini aytgan:
Tashrifim chog‘ida mintaqadagi yuqori salohiyatli kompaniyalarga sarmoya kiritish uchun Markaziy Osiyoda fond tashkil etiladi. Biz Markaziy Osiyo kompaniyalarini qo‘llab-quvvatlamoqchimiz. Bunda Britaniya kompaniyalari va tajribasi muhim rol o‘ynaydi.
Shuningdek, Kemeron Britaniya universitetlarida chet elliklarning o‘qishini qo‘llab-quvvatlovchi Chevening stipendiyalari uchun mablag‘ miqdorini ikki baravar oshirilishi va kelgusi uch yil davomida mintaqa bo‘ylab rivojlanish uchun 50 million funt sterling ajratilishini aytgan.
Diplomatga ko‘ra, fuqarolar, jumladan, ayollar va qizlar uchun ta’lim sifatini oshirish jamiyatning to‘liq salohiyatini amalda qo‘llash uchun juda muhim.
Men ushbu uchta sohani O‘zbekiston hukumati bilan muhokama qilishni intiqlik bilan kutyapman. Toshkentga tashrifimdan va bugungi O‘zbekistonni ko‘rish nasib qilganidan mamnunman. Oldimizda katta imkoniyatlar turibdi. Biz ulardan birgalikda foydalanishimiz kerak, — deydi britaniyalik diplomat.
Izoh (0)