Buyuk Britaniya tashqi ishlar vaziri Devid Kemeron 24-aprel kuni qozog‘istonlik hamkasbi Murat Nurtleu bilan uchrashdi. U suhbat davomida Markaziy Osiyoga tashrifiga to‘xtalib, Qozog‘iston yoki boshqa davlatga tanlov qilishi kerakligi so‘ralmayotganini ta’kidladi. Bu haqda Tengrinews xabar berdi.
“Qozog‘istonga yoki boshqa bir davlatga tanlov qilish kerakligini yoki Rossiya, Xitoy foydasiga hamkorlik hamda savdo qilmaslikni so‘ramayapmiz. Bu yerdaligimiz sababi siz umumiy xavfsizligimiz va farovonligimiz uchun ijobiy bo‘lgan tarzda biz bilan hamkorlik qilishni tanlash imkoniyatiga ega bo‘lishingiz kerak deb hisoblaymiz. Taʼkidlaganimizdek, siz Rossiya, Xitoy, Eron va Afg‘oniston bilan qo‘shni bo‘lib, hayotiy muhim mintaqada joylashgansiz. Bu yerda ko‘plab global chaqiriqlar mavjud.
Buyuk Britaniya shu yerda bo‘lishi va ta’limni, biznesni rivojlantirish, iqlim o‘zgarishiga qarshi kurashish, yoshlarga yangi imkoniyatlar yaratishda hamkor bo‘lishimizni aytish biz uchun muhim. Sizdan biz yoki boshqa derjava o‘rtasida tanlov qilishingizni so‘ramayapmiz”, — dedi Kemeron.
Kemeronning Toshkentga tashrifi
23-aprel kuni Britaniya tashqi ishlar vaziri o‘zbekistonlik hamkasbi Baxtiyor Saidov bilan uchrashdi. Uchrashuvda barcha sohalar bo‘yicha ikki tomonlama aloqalarni mustahkamlashga qaratilgan asosiy vazifalar belgilab olindi.
Shuningdek, ta’lim sohasidagi hamkorlikni rivojlantirishga o‘zaro tayyorlik qayd etildi. Muzokaralar yakunida Keng qamrovli sherikchilik to‘g‘risidagi deklaratsiya, Mintaqaviy va xalqaro bog‘liqlik hamda infratuzilma sohalaridagi hamkorlik to‘g‘risidagi anglashuv memorandumi imzolandi.
Shu kuni Kemeron Oliy Majlis Senati raisi Tanzila Norboyeva bilan ham uchrashuv o‘tkazdi. Suhbat davomida yashil iqtisodiyotni rivojlantirish sohasida qo‘shma loyihalarni yo‘lga qo‘yish, iqlim o‘zgarishi oqibatlariga qarshi kurashda o‘zaro hamkorlikni kuchaytirish muhimligi aytildi.
Devid Kemeron O‘zbekistonda inson huquqlarini taʼminlash, xususan, munosib mehnat tamoyillarini joriy etish, gender tenglikka erishish, oilaviy zo‘ravonlikka qarshi kurashish borasida ijobiy ishlar amalga oshirilayotganini alohida qayd etdi.
Izoh (0)