Ko‘pchilik Bobur Mansurovni shunchaki vayner deb biladi. Ammo u professional aktyor. Shunchaki kinodagi urinishlari muvaffaqiyatsiz bo‘lgan va vayner bo‘lgunigacha arzirli birorta rolni ijro etmagan. Xo‘sh, bugungi kunda yurtimizdagi eng mashhur vaynerlardan biri bo‘lgan va manaman degan aktyordan kam daromad topmaydigan Bobur Mansurov qanday qilib muvaffaqiyatga erishdi? Keling, shular haqida batafsil to‘xtalib o‘tamiz.
“Onam 50 yoshida talaba bo‘ldi”
Bobur Mansurov bolaligidan sanʼatga qiziqqan. Ammo oiladagi sharoit sabab sanʼat to‘garaklariga qatnashishga imkoni bo‘lmagan. U yashaydigan qishloq Tojikiston bilan chegaradosh hududda bo‘lgan. Bu yerlik aholi chorvachilik va dehqonchilik bilan shug‘ullangan. Bo‘lajak aktyor ham boshqa bolalar singari bolalikdan ro‘zg‘orga ko‘maklashgan.
— Sirdaryo viloyatida oddiy ishchilar oilasida dunyoga kelganman. Onam asli o‘shlik, dadam esa sirdaryolik bo‘lgan. Oilamizda qiz yo‘q, besh o‘g‘ilmiz. Shu boisdan ham bolaligimizdan mehnat qilishga o‘rganganmiz. Dadam kabobpaz bo‘lsa-da, barchamizni oliy maʼlumotli qilgan. Onam ham o‘qishni orzu qilardi. Hammamiz oliy maʼlumotli bo‘lganimizdan keyin o‘zi ham institutga hujjat topshirib, 50 yoshida talaba bo‘ldi, — deydi Bobur Mansurov.
“Ota kasbim kabobpazlik”
Bobur Mansurovning dadasi choyxonada kabobpaz bo‘lib ishlagan. Bo‘lajak aktyor darsdan keyin dadasining ish joyiga borib, unga ko‘maklashgan.
— Kabob pishirish, uning tuz-namagini to‘g‘rilash qo‘limdan keladi. Chunki ancha vaqt dadam bilan birga choyxonada ishlaganman, — deydi Bobur Mansurov.
“Xonanda bo‘lish orzum amalga oshmagan”
Aktyor bolalikdan qo‘shiqchi bo‘lishni orzu qilgan. Ammo Sirdaryodagi sanʼat kollejida xonandalik bo‘limi bo‘lmagani uchun drama aktyorligi bo‘limida o‘qishga majbur bo‘lgan. O‘qish davomida aktyorlikka mehri ortib, katta orzu-umidlar bilan O‘zbekiston davlat sanʼat va madaniyat institutiga hujjat topshirgan.
-ks1YzGdc.jpg)
— Ijodiy imtihondan keyin barcha orzu-umidlarim chilparchin bo‘lgan. Chunki men o‘z mahoratimga ishonardim. Ammo ikki yilgi imtihonda ham eng past ballni o‘zim olganman. Birinchi yil ijodiy imtihondan 13, keyingi yil esa 8 ball olganman. Bu umuman isteʼdodsiz aktyorsan, degandek gap edi, — deydi Bobur Mansurov.
“Sanʼatdan ko‘nglim qolgandi”
Ketma-ket imtihonlardan yiqilgan Bobur Mansurov o‘zini tadbirkorlik sohasida sinab ko‘rmoqchi bo‘ladi. Qishloq markazida Paynet shoxobchasini ochadi. Ammo ko‘p o‘tmay shoxobcha bankrotga uchraydi. Yaqinlari unga harbiy xizmatga borishni tavsiya qilishadi.
— Sanʼatdan butunlay ko‘nglim qolgan. Qo‘limdan hech narsa kelmaydi, isteʼdodsizman, deb tushkunlikka tushgandim. Ustiga ustak, birinchi yil harbiy xizmatga qabul qilishmadi: qon bosimim borligi xalal berdi. Kelasi yil esa bir yillik xizmatga qabul qilinib, Farg‘onaga yo‘l oldim, — deydi Bobur Mansurov.
“Ijodiy imtihondan past ball olganman”
Sanʼatga oshufta ko‘ngil har qanday sharoitda ham ijod qilishga imkon topadi. Bobur Mansurovning sanʼatga qiziqishini bilgan komandirlar uni harbiy qismlar o‘tkazadigan tanlovlarda ishtirok etishini so‘rashadi. Muvaffaqiyatli ishtirokidan so‘ng, jamoa bilan birga harbiylar o‘rtasidagi QVZda ishtirok etishni taklif qilishadi. Komandirlar “Agar g‘olib bo‘lsang, imtiyoz olishing mumkin”, deyishadi. Institutga kirish ishtiyoqi so‘nmagan Bobur Mansurov jamoasi bilan astoydil mehnat qilib, ikkinchi o‘rinni qo‘lga kiritadi.
— Harbiy xizmatni imtiyoz bilan yakunlaganman. Akam Jahon tillari universitetiga hujjat topshirishimni so‘ragan. Chunki oila aʼzolarim ham sanʼatkor bo‘lishimdan umidlarini uzgan edi. Akamdan yashirincha sanʼat institutiga hujjat topshirganman. Ammo ijodiy imtihondan past ball olganman. Imtiyoz sabab shartnoma asosida o‘qishga qabul qilinganman, — deydi Bobur Mansurov.
“Shunchalik xunukmanmi, nega rolga olishmaydi?”
Aktyor O‘zbekistonda xizmat ko‘rsatgan madaniyat xodimi Munavvara Abdullayeva qo‘lida tahsil oladi. U isteʼdodli ekanligini isbotlash uchun darslarda faol bo‘lishga va kastinglarda ishtirok etishga harakat qiladi. Ajablanarlisi shundaki, Bobur Mansurov 8 yil davomida birorta kastingdan o‘tmaydi.
— Hamma kursdoshlarim kastinglardan o‘tishardi. Ammo men biror marta epizod bo‘lsa-da, rolga qabul qilinmaganman. Ko‘rinishim yoqmaydimi, shunchalik xunukmanmi, deb o‘z-o‘zimga savol berardim. Hatto bir serialning kastingidan barcha kursdoshlarim o‘tgan, men esa o‘tolmaganman. Bir tomondan kursdoshlarimning yutug‘idan quvondim, boshqa tomondan esa ichimda g‘alati g‘alayon bo‘lgan, — deydi Bobur Mansurov.
“Haq olmay, telekanalda ishlaganman”
Birorta rolga tasdiqlanmagan ijodkor xususiy telekanallarning biriga ikkinchi rejissor sifatida ishga kiradi. Ammo u to‘rt oy ishlab, umuman haq olmaydi. Lekin tajriba orttirib, keyinchalik o‘zi serialga mustaqil rejissyorlik qiladi.
— Bir muddat haq olmay, telekanalda ishlaganman. Keyin “Orzular palatasi” nomli serialga rejissyorlik qilganman. Davlat byudjeti asosida suratga olingan serial — ilk mustaqil ishim bo‘lgan. Shuning uchun ham kamchiliklari yetarlicha, — deydi Bobur Mansurov.
“Rossiyaga ishlagani ketmoqchi bo‘lgandim”
Bobur Mansurov moliyaviy qiyinchiliklarga ko‘p uchragan ijodkor hisoblanadi. Shuning uchun ham vayner bo‘lishdan avval o‘zini butunlay boshqa sohalarda ham sinab ko‘rgan.
— Puldan yetishmovchilik hamisha bo‘lgan. Musofirchilikda tahsil olgan talabalar buni juda yaxshi bilishadi. Uydagilardan pul so‘rashga uyalib, ofitsiantlik qilganman. Ammo qiyinchilikning eng zo‘ri institutni bitirgandan keyin bo‘lgan. Sanʼatkorlarning oyligi juda kam, “syomka”larga umuman chaqirishmaydi. Ammo yashashingiz uchun hamisha pul kerak. Sanʼatda kelajagimni ko‘rmaganimdan keyin Rossiyaga ishlagani ketmoqchi bo‘lganman. Falon kunga samolyot bor ekan, deb hujjatlarni taxt qilib turganimda kursdoshlarim vaynerlik qilish taklifini berishgan, — deydi Bobur Mansurov.
“Videolarim o‘zimga yoqmagan”
Bir qarashda vaynerlik oson ko‘rinsa-da, professional aktyorlarning ko‘pi bu ishni o‘ziga ep ko‘rishmaydi. Bobur Mansurov ham to‘rt yil vayner bo‘lish uchun institutda o‘qidingmi, degan gaplardan qo‘rqib, olti oygacha videolarni ommaga chiqarmagan.
— Ikkilanganmiz, videolar shaxsan menga umuman yoqmagan. Shu bois bir necha oy ularni ommaga chiqarmaganmiz. Ibrat ismli kursdoshim sabab bo‘lib ilk videolarimiz Instagramʼga joylangan, —deydi Bobur Mansurov.
“Chiqindixona ham mashhur bo‘lib ketdi”
Bobur Mansurov oddiy odamlar haqida hazil videolar suratga olishi bilan boshqa vaynerlardan farq qiladi. Chiqindixonadagi motivator, qurumsoq oshiq haqidagi videolar shular jumlasidan.
— Voqealarning ko‘pi men yoki do‘stlarimning hayotida sodir bo‘lgan. Hatto chiqindixonadagi motivator voqeasiga duch kelganimdan keyin shu haqda video olishga qaror qilganmiz. Mahallamizdagi chiqindixona juda mashhur bo‘lib ketdi, shunday kunlar ham keldiki, u yerda video olishimizga ruxsat berishmadi, — deydi Bobur Mansurov.
Sanʼatkor qizga uylandi
2023-yil Bobur Mansurov oila qurdi. U o‘zidan sakkiz yosh kichik Fariza Oripova ismli qiz bilan oila qurdi.
— Ayolim bilan musiqa festivalida uchrashib qolganmiz. U oddiy tomoshabin bo‘lib kelgan. Ko‘ngil ko‘ngilga to‘g‘ri kelib oila qurdik, — deydi Bobur Mansurov.
Fariza Oripova ham sanʼatga begona emas, u O‘zbekiston davlat konservatoriyasida tahsil oladi, shirali ovozi bor. U Instagram tarmog‘ida kuzatuvchilarning nega vayner bilan oila qurgani haqidagi savollariga quyidagicha javob bergandi.
— Turmush o‘rtog‘imdek oqko‘ngil, samimiy, sodda inson sanʼat sohasida kam uchraydi. Umuman kibrga berilmagan, har qanday holatda bir xil. Hurmat qiladigan va o‘rganishim kerak bo‘lgan xislatlari juda ko‘p. Allohning sinovlariga shukr qilgan, iymonli insonlar. Gapirsam gap ko‘p. Shuning uchun ko‘ngil qo‘yganman.
Yoshimiz orasidagi farq — 8 yil. Avvalo taqdir. Bir-birimizga ko‘ngil qo‘ydik. Dunyoqarashlarimiz to‘g‘ri keldi. Keyin ota-onamizning duosi va roziliklari bilan turmush qurdik. Ko‘pchilik ijtimoiy tarmoqlarda bir-biriga mos emas, unga boshqa qiz mos edi, deb yozganiga ko‘zim tushdi. Lekin shuni bilingki, kim kimning halol jufti bo‘lishi kerak ekanini, bir-biriga to‘g‘ri kelish-kelmasligini faqat Yaratgan egam va keyin o‘zimiz bilamiz, — deb yozgandi Fariza Oripova.
Bobur Mansurovning reklama narxi qancha?
Bu savol ko‘pchilikni qiziqtirishi aniq. Tan olish kerak, Bobur Mansurov hozirda talabgor vaynerlardan biriga aylanib ulgurgan. Instagram’da aktyorning reklama narxlari: stories —1500, post —5000 AQSH dollari etib baholangan.
Keti uzilmayotgan reklamalar sabab aktyor poytaxt markazidan uy sotib oldi, mashinasining markasi ham havas qilgudek.
Izoh (0)