“Million” jamoasi a’zosi va Instagram tarmog‘ida 2,2 mln obunachiga ega bo‘lgan Mo‘min Ibrohimov “Daryo”ga bergan intervyusida vaynlarga ko‘p mablag‘ sarflashi va ular o‘zini qanchalik oqlashi haqida gapirdi.
— Haqiqatan ham vaynlarga mablag‘ ayamayman. Vaynlar professional texnikalarda olinadi, grafika mutaxassislarining xizmatidan ham foydalanamiz. Grafika ishi esa arzon turmasligini ko‘pchilik yaxshi biladi.
Kinolarni yaxshi ko‘rganim uchun vayn emas, kinokontent yo‘nalishini tanlaganman. Kinoga qancha mablag‘ sarflasangiz, kadrlar shuncha yaxshi chiqqanidek, kinokontent ham xuddi shunday. Eng qimmatga tushgan kinokontent futbol haqidagisi bo‘ldi. Mitti.me jamoasi bilan olingan rolik uchun 11 ming AQSH dollari sarflangan. Chunki uning grafikasini Gollivudda qildirganmiz. “Qudalar jangi” nomli roligimiz ham muvaffaqiyatli chiqqan. Uni xorijliklar o‘z tillariga tarjima qilib, namoyish etganlaridan ham xabarimiz bor. Uning grafikasiga 1300 AQSH dollari sarflaganmiz.
“Shuncha mablag‘ sarflabsiz, bu o‘zini qanchalik oqlaydi?” deb ko‘p so‘rashadi. Gap ketgan mablag‘ning qaytib kelishida emas, O‘zbekistonda ham sifat borligini dunyo ko‘rishini istayman. Hozir ijtimoiy tarmoqlarda kuzatuvchi yig‘ish u qadar qiyin emas.
Kinokontent yo‘nalishida reklama suratga olib berishni so‘rayotganlar ham ko‘p. Ammo ko‘pchilik sarflanadigan mablag‘ni eshitib rozi bo‘lmaydi. Masalan, Davron Kabulov “Million”ning yangi konsert reklamasini shu yo‘nalishda suratga olib berishimni so‘radi. Xarajatlarning o‘zi 7 ming AQSH dollari bo‘ldi. Qimmat, ammo samarali natija berdi.
Oddiy vayn olishni istamayman. Hammasi uchun alohida tayyorgarlik ko‘riladi, kerak bo‘lsa Yangiobod bozoriga borib, rekvizitlar ham sotib olamiz. Masalan, falokat yigit haqidagi kinokontentda grafikadan umuman foydalanmaganmiz. Ammo ancha vaqt eski buyumlar sotiladigan bozorga borib, kerakli rekvizitlarni to‘plaganman, — deydi Mo‘min Ibrohimov.
Mo‘min Ibrohimov suhbat davomida serialda arzimas haq evaziga suratga tushgani va uni efirda ko‘rib afsuslangani haqida gapirdi.
— “Istanbullik kelin” aslida kino emas, serial bo‘lgan. Xullas, prodyuser o‘z cho‘ntagini o‘ylab, seriallar qismini oshirishga harakat qilgan. Uni efirda ko‘rib, zerikib ketganman. Shuning uchun ham bundan keyin birorta serialda suratga tushishga rozi bo‘lganim yo‘q. Keyin serialni yana qayta montaj qilib, 5 qismli kino sifatida ham efirga berishdi. Maʼno bir-biriga to‘g‘ri kelmaydi, bu loyiha faqat pul topish uchun olinganini angladim. 80 qismli serial uchun uch oy vaqtimni sarfladim. Adashmasam shuncha mehnat uchun 2 ming AQSH dollari olganman xolos. Shuncha mehnat zoye ketganiga afsuslanaman. Hamma narsada hikmat bor deganlaridek, bu loyiha sabab Asqar Hikmatov bilan yaqindan tanishganman, — deydi Mo‘min Ibrohimov.
Izoh (0)