Aktyor Asqar Hikmatov tomoshabinlarga komik rollari bilan yaxshi tanish. Ammo ko‘pchilik u haqida deyarli hech qanday maʼlumotga ega emas.
Asqar Hikmatov 1987-yilning 19-dekabrida Toshkent shahrida tavallud topgan. U oilada uch o‘g‘ilning kattasi.
— 4-5 sinfga qadar kelajakda qaysi kasbni tanlashimni bilmasdim. Aktyorlikka-ku umuman qiziqish bo‘lmagan. Oila aʼzolarim orasida ham sanʼatkorlar yo‘qligi uchun aktyor bo‘lish yetti uxlab tushimga ham kirmagandi. Bir kuni sinfdosh do‘stim to‘garakka qatnayotgani haqida aytib qoldi. Borsak, to‘garaklarning soni nihoyatda ko‘p ekan. O‘shanda “Aktyorlik to‘garagiga qatnashganlarni televizorga olib chiqisharkan”, degan gap qulog‘imga chalinib qolgan. Ekranda ko‘rinish orzusi bilan shu drama to‘garagiga qatnaganman. “Senda o‘xshayapti, zo‘r ijro etyapsan”, degan motivatsiya katta kuch bag‘ishlagan. Shundan keyin sanʼat kollejidan, undan institutga o‘qishga kirganman. U paytlari ham ko‘rsatuv va teleloyihalarga takliflar ko‘p bo‘lardi. Ammo chiqishni istamasdim. “Birinchi urinishda zo‘r rol ijro etaman”, deb niyat qilardim, — deydi aktyor Asqar Hikmatov.
Aktyor ilk rolini institutning ikkinchi bosqichida o‘qib yurgan paytida ustozi Jahongir Ahmedovning “Tundan tonggacha” filmida ijro etgan.
— U paytda Jahongir aka magistratura bosqichida o‘qirdi, shu bilan birga bizga dars ham o‘tardi. Ustoz bilan yaxshi kelishardik, ammo ijodiy ishlari sabab darslarni boshqa pedogoglarga topshirdi. Bir kuni “Asqar yangi film boshlamoqchiman, bitta kichik rol bor seni sinab ko‘ramizmi?” dedi. Ilk rolimni “Tundan tonggacha” filmida ijro etganman. U paytgacha hatto, klipda ham suratga tushmaganim uchun hayajonlanganman. Alisher Uzoqov bilan rol ijro etish katta sharaf edi-da. Film mashhurlikka erishganida ko‘cha-kuyda odamlar “bananchi bola” deb chaqiradigan bo‘lgan, — deydi Asqar Hikmatov.
Aktyor kino sabab Mirfayozga aylangani va ancha vaqtgacha odamlar uni ism-sharifi bilan emas, qahramon nomi bilan atagani haqida aytib o‘tdi.
— “Mening do‘stim jin” filmidan keyin hamma Mirfayoz deyishni boshlagan. Ism-sharifimni bilishmasdi. Bu filmning muxlislarining ko‘pchiligini bolalar tashkil qilgani uchun ko‘cha-kuyda “Mirpiyoz” deb mazah qilishardi. Birinchi marta ko‘chada ism-sharifim bilan chaqirishganda yig‘lab yuborganman. Kimgadir erish tuyulishi mumkin, ammo odamlar og‘zidan ism-familiyamni eshitib xursand bo‘lib ketganman, — deydi Asqar Hikmatov.
Aktyor ayoli bilan qanday tanishgani va uning rashkchiligidan bezor bo‘lgani haqida gapirdi.
— Hamma yigitlarga aytilganidek menga ham “Qachon uylanasan, katta yigit bo‘lib qolding”, deb ko‘p gapirishgan. Uyimizda qizlarning rasmi shu qadar ko‘p ediki, ko‘zim tushishi uchun hatto muzlatkichga ham yopishtirib qo‘yishardi. Mahbuba bilan ham sovchilik orqali tanishganmiz. U paytda bankda ishlardi. Sekingina bankka borib qizni ko‘rib kel, deyishgan. Ammo talab bo‘yicha u ishlaydigan bo‘limga posport bilan kiritilar ekan. Aksiga olib yonimda shaxsimni tasdiqlovchi hujjat bo‘lmagani uchun kirolmaganman.
Keyin ko‘chada uchrashadigan bo‘ldik. U paytda mashinam bo‘lmagani uchun xonanda Tohir Usmonovdan iltimos qilganman. Ammo uchrashuvga chiqqanda sovg‘a olish ham esimdan chiqqan. Chunki o‘sha paytda qaysidir filmning syomkasi bilan band edim. Do‘stlarim uchrashuvga gul va shirinlikni yetkazib olib kelgan.
Avvaliga ayolim juda rashkchi edi. Tinimsiz qo‘ng‘iroq qilib “Qayerdasiz? Nechida kelasiz?”, deb so‘rayverardi. Ayniqsa, birinchi farzandimizga homiladorligida o‘ta rashkchi bo‘lib qolgandi. Hozir ancha ko‘nikib qolgan, aktyorning hayotida yashashga o‘rgandi, — deydi Asqar Hikmatov.
Aktyor to‘yi kuni sodir bo‘lgan qiziqarli voqea haqida ham so‘zlab berdi.
— Mahbuba bilan tanishganimizdan keyin ikki oy o‘tib to‘y qilganmiz. Nikoh oqshomi ayni qizigan payt ayolim sekin turtib “Negadir havo yetmayapti”, degan. Oldiga o‘tib, uni tashqariga olib chiqqanman. Eng qizig‘i, kelin-kuyov yo‘qligini ko‘pchilik sezmay qolgan. Tashqariga olib chiqib, biroz havo almashtirganman keyin kelib yana joyimizga o‘tirganmiz. O‘shanda baʼzi insonlar “To‘yi kuni yo‘qolib qoldi”, deb gap qilishgan ekan. Menga-ku, bu gaplar taʼsir qilmagan, ammo ayolim o‘ylab siqilgandi, — deydi aktyor Asqar Hikmatov.
Ayni kunlarda asosan vayn yo‘nalishida ijod qilayotgan Asqar Hikmatov qimirlaydigan quloqlarining sirini fosh qildi.
— Qimirlaydigan quloqlar ajoyib topilma bo‘lgan. Ko‘pchilik “Buni qanday suratga olasizlar? Montaj qilasizlarmi?” deb so‘raydi. Uning siri juda oddiy. Quloqlarimga rangsiz ip bog‘lashadi va yuqoridan uni gapimga moslab tortib turishadi. Qarabsizki, quloqlari qimirlaydigan qaynota obrazi paydo bo‘ladi, — deydi Asqar Hikmatov.
Asqar Hikmatov oilali, ikki nafar farzandning otasi. Ayoli bankdagi faoliyatini yakunlab hozirgi kunda bolalar uqalovchisi bo‘lib ishlaydi. Aktyor kino va ijtimoiy tarmoqlardagi faoliyatidan tashqari, Yosh tomoshabinlar teatrida ham ishlaydi.
Izoh (0)