“Hamma narsa qildim, lekin ayollarimni rozi qila olmadim”. Jahongir Otajonov 6 marta uylanib ajrashgani hamda 8 nafar farzandi bilan munosabatlari haqida (video)

Xonanda Jahongir Otajonov “Mirsodiqova bilan” YouTube kanaliga bergan intervyusida ilk marta shaxsiy hayoti bilan bog‘liq savollarga javob berdi.    


Xonanda ota-onasi va opa-ukalari haqida so‘zlab berdi. 
— Ota-onam o‘qituvchi, otam nemis tilidan, onam esa o‘zbek tili va adabiyotidan dars berishgan. Mendan katta opam bor, moliya sohasida ishlaydi. Ukam Alisher o‘qimagan, men va singlim E’tibor. E’tibor san’atga qiziqdi, lekin men unga yordam bermadim. Chunki uning san’atkor bo‘lishini xohlamadim.

Jahongir Otajonov olti marta uylanib, ajrashgani haqida ilk bor gapirdi

— Olti marta uylanib, ajrashganman. Birinchi turmushimdan 19 yoshli qizim bor, u hozir onasi bilan Germaniyada yashaydi. Ikkinchi turmushimdan uch nafar farzandim bor, ularga qarayman. Uchinchi turmushimdan bir o‘g‘lim bor, aliment oladi. To‘rtinchi turmushimdan ham bir o‘g‘lim bor, u ham aliment oladi. Beshinchi turmushimdan bir qizim bor, unga qarayman. Oltinchi turmushimdan bir o‘g‘lim bor, u bilan umuman munosabatim yo‘q. Gohida ko‘rishib turaman. O‘g‘lim ikki yosh bo‘lgan hozir.

Bilasizmi, erkak kishiga hech qachon “Senga tegib nima ko‘rdim?”, deb bo‘lmaydi. Men asosan qiynalgan oilalarning farzandlariga uylanishga harakat qilganman.

— Birinchi rafiqam boy oilaning qizi bo‘lgan. Men unga boy bo‘lgani uchun uylanmaganman. Ularnikiga mehmonga borganimda oilasiga, mehmon kutishlariga havasim kelib, mening ham shunday oilam bo‘lsin, deganman. Yaxshi qiz, hozir ham yaxshi munosabatdamiz. Afsuski, turmushimiz bo‘lmadi. Unga uylandim, lekin u qiz uydagilarimga yoqmadi. Uyimga ham kira olmay qoldim u qiz bilan. O‘shanda qizning otasi “Men farzandlarimga deb uy olib qo‘yganman, xohlasangiz shu uyda yashab turinglar, dedi. Bir kuni onasi to‘g‘ri uyga keldi-da, muzlatkichni ochdi, “Qizim nima yeyayotgani menga qiziq”, dedi. Bu narsa mening g‘ururimga tegdi. Erkak kishiga bunday narsalarni gapirib bo‘lmaydi. Bir kuni xotinim bilan gap talashib qoldik va “Otamning uyida o‘tiribsan”, dedi. Shu gapdan keyin uydan chiqib ketdim va ajrashdim.

Ikkinchi turmush o‘rtog‘im 10 yil yashaganimizdan keyin “Senga tegib nima ko‘rdim?”, dedi. O‘zi vaqtida odamlarning uyini supurib, tozalab yurardi. Shu gapi menga tegib ketdi. Uydan chiqib ketdim. Hozirda uch farzandim bilan aloqam yaxshi, ularni to‘liq ta’minlayman. Sobiq rafiqam ham juda yaxshi inson. Yaxshi munosabatdamiz. U “Sen er sifatida yaxshi emassan, lekin dunyodagi eng zo‘r otasan”, deydi.

Xonanda yana bir bor uylanish rejasi borligini yashirmadi

— Keyingi rafiqalarimga kelsak, kimdirlari chiqib intervyular berdi men haqimda, keyin o‘zlari xohlagan narsani oldi. Bittasi aliment talab qilgandi, mayli aliment to‘layman, dedim va unga bergan ikki xonali uyimni olib qo‘ydim. Istaganini oldi.

Bilasizmi, yana uylanardim. U qiz Alloh oldida menga omonatligini bilaman, uning ota-onasi mening ota-onam ekanligini bilaman, mashina haydagisi kelsa, mashina olib berishim kerakligini, uni yaxshi kiyintirib, yaxshi yedirib-ichirishim kerakligini bilaman. Lekin nimagadir ayollarimni rozi qila olmadim, — deydi xonanda.