Maftunkor aktrisa Zarina Nizomiddinova bu yil 35 yoshni qarshiladi. Tashqi ko‘rinishidan bunga shubha qilishingiz aniq. Sport bilan muntazam shug‘ullanadigan va to‘g‘ri ovqatlanishga amal qilgan aktrisaning ko‘rinishi doimgidek aʼlo darajada.
Xo‘sh, kinodan biroz yiroqlashgan aktrisa, ayni damda nimalar bilan band, uning sanʼat olamiga kirib kelish jarayoni qanday kechgan. Keling, bular haqida batafsil to‘xtalamiz.
“Styuardessa bo‘lishni istagandim”
Zarina sanʼatkorlar oilasida tug‘ilganligi uchun bolaligidan sanʼat to‘garaklariga qatnagan. U 5 yoshidan xor mashg‘ulotlariga qatnab, sakkiz yoshida Uspenskiy nomidagi musiqa maktabining fortepiano bo‘limiga qabul qilinadi. Yaqinlari uning musiqiy uquvidan qoniqmay, raqs bilan shug‘ullanishini istaydi. Zarina Nizomiddinova 7-sinfdan o‘qishni Xoreografiya oliy maktabining milliy raqs bo‘limida davom ettiradi.
— Bolaligimda ko‘p narsalarga qiziqqanman. Yoshim ulg‘ayib borgani sari FHDY bo‘lim boshlig‘i bo‘lib ishlashni xohlaganman. O‘ylab ko‘ring, ikki yosh baxt pillapoyalari sari ilk qadamni tashlash arafasida, siz esa ularning muhabbati va visol kuniga sheriksiz. Ularga eng muhim hujjatni tantanali ravishda taqdim etib, chiroyli tilaklarni aytasiz. Bu men uchun juda ham qiziqarli va zavqli ish bo‘lib ko‘ringan. Shuning uchun to‘ylarda o‘sha xodimlarga o‘xshab niyat bildirib, kelin-kuyov oldida gapirishni orzu qilganman. Keyinchalik, hatto styuardessa bo‘lishni ham istaganman. Ularning bejirim libosiga ishqim tushgan. Ammo samolyotda uchishdan qo‘rqqanim uchun bu fikrdan qaytganman, — deydi aktrisa intervyularining birida.
Uning ismi Zarina emas
Zarina Nizomiddinova O‘zbekistonda xizmat ko‘rsatgan artist Shahboz Nizomiddinovning kenja farzandi hisoblanadi. Aslida uning oilasi uchun sanʼatkor bo‘lish yangilik emas. Shu bois, Zarina ham hali tili chiqmay turib, klipda suratga tushgan. Eng qizig‘i, qo‘shiqni uning opasi va akasi ijro etgan.
Uning opasi Mohinur va akasi Shohruh tomonidan kuylangan “Karate-karate” qo‘shig‘i 1990-yillarda xit bo‘lgan. Ha aytgancha, aktrisaning pasportdagi ismi hayotdagisidan farq qiladi. Aslida uning ismi Zarrin.
Tasodifan uni rolga tasdiqlashgan
Odatda kinorejissyorlar rollarga chiroyli qizlarni xoreografiya raqs maktabidan izlaydi. Zarinaning kino olamiga kirib kelishiga ham shunday tashriflar sabab bo‘lgan. U ilk rolini Tamara Kamalovaning “Yo‘l bo‘lsin” filmida ijro etadi. 2006-yili esa Bahrom Yoqubovning “Romeo va Julyetta” filmida suratga tushadi. Mana shu film Zarinani aktrisa sifatida elga tanitgan.
— Birinchi rolimni shu klipda ijro etgan ekanman. Dadam hayotliklarida klipda ham, kinoda ham birga suratga tushish nasib etmadi. Ammo, eʼtibor berib qarasam, ijodimni aynan dadajonim bilan mana shu klipdan boshlagan ekanman. O‘shanda otajonimning qo‘llab-quvvatlaganliklari shu kungacha yordam berib kelyapti, — deb otasi haqida post qoldirgandi aktrisa.
“Umrimdagi eng katta judolik”
Afsonaviy “Yalla” ansambli asoschilaridan biri Shahboz Nizomiddinov 2015-yil 23-aprel kuni 69 yoshida vafot etgandi. Aktrisa intervyularining birida otasini yo‘qotgani hayotidagi eng og‘ir ayriliq bo‘lgani haqida so‘zlab bergandi.
— O‘shanda juda ham qiynalganman. Umrimdagi eng katta judolik bo‘lgan. Har bir farzand uchun otasidan ayrilish juda og‘ir. Yaratganga shukr, onajonim hayotlar. Qolgan ayriliqlarga esa u qadar kuyinganim yo‘q. Hammasi taqdirdan, deya bunga oddiy qaraganman. Ayol kishi ko‘p narsalarga ko‘nikib borar ekan. Har qanday ayriliqqa ham. Faqat otadan ayrilish og‘ir judolik ekan, — deydi aktrisa.
“Turmush o‘rtog‘im bilan yashashga ko‘zim yetmagan”
Aktrisa Zarina Nizomiddinova juda erta oila qurganini taʼkidlaydi. Katta o‘g‘li Temurbekni ham 18 yoshida dunyoga keltirgan. Xorijdagi turmushi u qadar muvaffaqiyatli kechmagach, Toshkentga qaytib ijodini davom ettirgan.
— Birinchi turmush o‘rtog‘im meni “Romeo va Julyetta” filmidagi obrazimni ko‘rib yoqtirib qolgan. O‘g‘lim otasi haqida umuman so‘ramaydi. Chunki, uni deyarli ko‘rmagan. Otasi ham hech qachon qo‘ng‘iroq qilib, o‘g‘lining holidan xabar olmaydi. Sababini bilmayman. O‘g‘limning otasi bilan ajrashganimizdan beri gaplashmaymiz. U oilani saqlab qolishga harakat qilgan. Lekin birga yashab ketishimizga mening ko‘zim yetmagan. Bo‘lmaydigan narsani bo‘lmagani yaxshi, — deydi aktrisa intervyularining birida.
2015-yilning 18-yanvar kuni esa ikkinchi bor oila qurdi. Navbatdagi turmush o‘rtog‘i o‘zidan ancha katta va tadbirkorlik bilan shug‘ullandi. Afsuski, aktrisaning bu nikohi ham uzoqqa cho‘zilmadi.
“Mish-mishlarga ko‘nikib qolganman”
Oradan to‘rt yil o‘tib aktrisaning shaxsiy hayotida yana bir o‘zgarish sodir bo‘ldi. U Moskva shahrida istiqomat qiluvchi, o‘zidan 12 yosh katta inson bilan oila qurdi va 2020-yilda Saidumar ismli o‘g‘lini dunyoga keltirdi.
— Men omma eʼtiboridagi shaxsman. Men haqimda turli gap-so‘zlar, mish-mishlar bo‘lishi tabiiy. Bunga ko‘nikib qolganman. Baʼzan izohlarni o‘qib, kulgim keladi. Hozir kimgadir nimanidir isbotlaydigan vaqt emas. Meni yaxshi biladigan va adekvat insonlar shundoq ham menga ishonadi. Umuman olganda, men hamma narsani vaqt hukmiga tashlayman. Vaqt hammasini o‘z joyiga qo‘yadi, — deb ijtimoiy tarmoqdagi savollarga javob bergan aktrisa.
Zarina Nizomiddinova bugungi kunda ikki o‘g‘li va turmush o‘rtog‘i bilan Moskvada yashaydi. Vaqti-vaqti bilan O‘zbekistonga kelib, shartnoma asosida film va seriallarda suratga tushmoqda. U so‘nggi marta Toshkentga kelganida “Parixona” serialida ishtirok etdi. Ammo aytish mumkinki, u O‘zbekistondagi gonorari eng yuqori aktrisalardan biri. Ijodda u qadar faol bo‘lmasa-da, unga bo‘lgan talab nihoyatda yuqori.
“Sportsiz kunimni tasavvur etolmayman”
Aktrisa sport bilan muntazam shug‘ullanadi. Ot sporti ham uning eng sevimli mashg‘ulotlaridan biri. Garchi uning mashg‘ulotlardagi rasm va videolari ko‘plab muhokamalarga sabab bo‘lsa-da, aktrisa ularga eʼtibor bermaydi.
— Sportsiz kunimni tasavvur etolmayman. U chiroyli qomat, salomatlik va tetiklik manbayi, — deydi aktrisa.
Qo‘shiqlari u qadar omadli emas
Zarina Nizomiddinova 2014-yili xonandalik faoliyatini boshlagandi. U “Afsonaviy” va “Meni kechir” nomli qo‘shiqlarni ijro etib, klip suratga olgandi.
Bundan tashqari, yosh ijodkor bilan “Sen yuragimda” nomli duet taronani ham ijro etgandi. Qo‘shiq aytish aktrisaning shunchaki xobbisi bo‘lgani va uni rivojlantirishga katta kuch sarflamaganini aytib o‘tgan. Lekin uning qo‘shiqlariga ishlangan kliplar o‘z davrining eng byudjeti katta ijod mahsullaridan biri bo‘lgan. Hozirgi kunda aktrisa qo‘shiqchilik faoliyatini boshlagan ko‘rinadi. Dekabr oyida u “Yuragimda” nomli qo‘shig‘ini premyera qilgandi. Ammo tan olish kerakki, uning birorta qo‘shig‘i rollaridek mashhurlikka erishgani yo‘q.
Izoh (0)