AQSH Federal zaxira tizimi tomonidan o‘tkazilgan tadqiqotga ko‘ra, 2023-yil oxiriga ko‘ra amerikaliklarning eng badavlat 1 foizining boyligi fond bozorining o‘sishi tufayli rekord darajadagi 44,6 trillion dollarga yetdi.
Federal zaxira hisob-kitoblariga ko‘ra, AQSH fuqarolarining eng badavlat 1 foiziga jami boyligi 11 million dollardan oshganlar kiradi. 2023-yilning to‘rtinchi choragida ular jami 2 trillion dollarga boyishdi. Bunday o‘sish ularga tegishli bo‘lgan aksiyalar narxi oshishidan kelib chiqqan. Kompaniyalar aksiyalarining qiymati va ular egalik qiladigan investitsiya fondlari uchinchi chorak oxiridagi 17,65 trillion dollardan 19,7 trillion dollarga ko‘tarildi.
2020-yil boshidan beri AQSHning eng badavlat aholisining boyligi jami 49 foizga oshdi. Shu bilan birga, o‘rta sinf vakillarining aktivlari ham 50 foizga o‘sgan.
“Qimmatli qog‘ozlar bozoridagi poyga iste’molchilar ishonchini qozonish va umumiy iqtisodiy o‘sish uchun kuchli ijobiy omil hisoblanadi”, — dedi Moody’s Analytics katta iqtisodchisi Mark Zandi.
Federal zaxira tizimi hisob-kitoblariga ko‘ra, eng boy amerikaliklarning 10 foizi xususiy aksiyalarning 87 foiziga egalik qiladi.
Izoh (0)