AQSH benzinda yuradigan avtomobillar uchun zararli chiqindi gazlar bo‘yicha standartlarni qat’iylashtirdi

AQSh atrof-muhitni muhofaza qilish agentligi (EPA) avtomobillar uchun zararli chiqindi gazlar bo‘yicha yangi standartlarni tasdiqladi.

The New York Times nashrining yozishicha, bu elektr va gibrid avtomobillar sonini ko‘paytirish uchun ishlab chiqilgan mamlakat tarixidagi eng muhim qoidalaridan biri.

Yangi standartlar 2027–2032 yillarda ishlab chiqariladigan yengil va tijorat transport vositalariga (yuk mashinalari bundan mustasno) nisbatan qo‘llaniladi. Amaldagi standart bilan solishtirganda, yengil avtomobillar uchun ruxsat etilgan chiqindilar 2026-yilda 50 foizga, o‘rta yuk avtomobillari uchun esa 44 foizga kamayadi.

Umuman olganda, AQSh atrof-muhitni muhofaza qilish agentligi hisob-kitoblariga ko'ra, yangi qoidalar 7 milliard tonnadan ortiq karbonat angidrid chiqindilarining  atrofga tarqalishining oldini oladi va iqtisodiyotga har yili qariyb 100 milliard dollar foyda keltiradi. Shu jumladan, havo sifatini yaxshilash natijasida aholi salomatligi uchun sarflanadigan 13 milliard dollar iqtisod qilinadi. Bundan tashqari, haydovchilar uchun yoqilg‘i va texnik xizmat ko‘rsatish xarajatlarini kamayishi natijasida 62 milliard dollar tejab qolinadi.

AQSh atrof-muhitni muhofaza qilish agentligi hisob-kitoblariga ko'ra, agar elektr transport vositalari sotuvi 2032-yilga kelib AQSh avtomobillari savdosining 56 foizini tashkil qilsa, avtomobil sanoati yangi standartlarga javob bera oladi. Gibrid va boshqa qisman elektr transport vositalarining ulushi kamida 13% bo'lishi kerak.

Avtomobillar AQShda karbonat angidrid chiqindilarining eng katta manbai hisoblanadi. Shu bilan birga, The New York Times ta'kidlaganidek, elektr transport vositalariga o'tish ishlab chiqarish, infratuzilma, texnologiya, mehnat, global savdo va iste'molchi uchun katta o'zgarishlarni amalga oshirishni talab qiladi.