Qo‘shma Shtatlar va Janubiy Koreya shu haftada Shimoliy Koreyani noqonuniy neft sotib olishni to‘xtatishga qaratilgan yangi ishchi guruhini joriy qildi. Bu haqda Reuters xabar berdi.
Vashingtonda 26-mart kuni ishchi guruh birinchi yig‘ilishini o‘tkazgan.
Uchrashuvda vazirlik va idoralarning diplomatiya, razvedka, sanksiyalar va dengiz taqiqlari uchun masʼul bo‘lgan 30 dan ortiq rasmiy vakillari ishtirok etdi, — deyiladi Janubiy Koreya TIV bayonotida.
Har ikki tomon Rossiyaning Shimoliy Koreyaga neft yetkazib berish ehtimolidan xavotir bildirib, Moskva va Pxenyan o‘rtasidagi noqonuniy hamkorlikni to‘xtatish yo‘llarini muhokama qilgan.
BMT Xavfsizlik Kengashi Shimoliy Koreyaning yadro qurollari va raketa dasturlariga qo‘ygan cheklovlariga ko‘ra, Pxenyan yiliga 4 million barrel xom neft va 500 ming barrel qayta ishlangan mahsulotlar importi bilan cheklanadi.
BMT diplomati Rossiya BMTning Shimoliy Koreyaga qarshi sanksiyalarni nazorat qiluvchi rezolyutsiyaga veto qo‘yishi ehtimoli kattaligini aytgan.
BMTning sanksiyalarni nazorat qiluvchi guruhi shu oyda Shimoliy Koreya bayrog‘i ostidagi tankerlar o‘tgan yilning 1-yanvaridan 15-sentyabrgacha 1,5 million barreldan ortiq neft mahsulotlarini yetkazib berganini maʼlum qilgan. Sunʼiy yo‘ldoshdan olingan tasvirlar Shimoliy Koreyaning neft tankerlari, jumladan, sanksiyalangan baʼzi kemalar so‘nggi haftalarda Rossiya portlariga tashrif buyurganini ko‘rsatgan.
AQSH—Janubiy Koreya ishchi guruhi Shimoliy Koreyaning sanksiyalardan bo‘yin tovlash faoliyatini fosh qilish, bir tomonlama sanksiyalar qo‘llash va mintaqadagi xususiy sektor va uchinchi tomonlarni qasddan yoki bilmasdan neft yetkazib berishga yordam berishini ko‘rib chiqmoqda.
Kelgusida ishchi guruh sanksiyalardan qochishning boshqa sohalarini, jumladan, ko‘mir sotishni ham ko‘rib chiqishi mumkin, — deyiladi departament bayonotida.
Izoh (0)