Toshkent shahar IIBB Yo‘l harakati xavfsizligi boshqarmasi Sergeli tumani Fayzli ko‘chasida katta tezlikda harakatlangan transport vositalari yuzasidan ma’lumot berdi.
Ijtimoiy tarmoqlarda Tahoe rusumli avtomashinasi hamda BYD rusumli avtomashinasi haydovchilari o‘zi va o‘zgalarning hayotini xavf ostiga qo‘ygan holda soatiga 170-180 kilometr tezlikda harakatlangani aks etgan videolar tarqaldi.
Holat bo‘yicha Toshkent shahar IIBB YHXB masʼul xodimlari tomonidan surishtiruv ishlari amalga oshirilib, Tahoe’ning 26 yoshli haydovchisi A. va BYD’ning 35 yoshli haydovchisi S.ga nisbatan Ma’muriy javobgarlik to‘g‘risidagi kodeksning 128-3-moddasi (transport vositalari haydovchilarining belgilangan harakat tezligini oshirib yuborishi) bilan maʼmuriy bayonnoma rasmiylashtirilgan.
Shuningdek, idora ma’lumotlariga ko‘ra, qoidabuzar haydovchilar bilan profilaktik suhbat olib borilgan.
Avvalroq Xorazmda 12,5 ming nafar qoidabuzar haydovchidan 3,8 mlrd so‘mdan ortiq qarzdorlik undirilgani to‘g‘risida xabar berilgandi. Jarimani to‘lashdan bosh tortgan qarzdorlarga tegishli bo‘lgan 137 ta avtotransport vositalari jarima maydonchasiga joylashtirilgan.
Izoh (0)