Тошкент шаҳар ИИББ Йўл ҳаракати хавфсизлиги бошқармаси Сергели тумани Файзли кўчасида катта тезликда ҳаракатланган транспорт воситалари юзасидан маълумот берди.
Ижтимоий тармоқларда Tahoe русумли автомашинаси ҳамда BYD русумли автомашинаси ҳайдовчилари ўзи ва ўзгаларнинг ҳаётини хавф остига қўйган ҳолда соатига 170-180 километр тезликда ҳаракатлангани акс этган видеолар тарқалди.
Ҳолат бўйича Тошкент шаҳар ИИББ ЙҲХБ масъул ходимлари томонидан суриштирув ишлари амалга оширилиб, Tahoe’нинг 26 ёшли ҳайдовчиси А. ва BYD’нинг 35 ёшли ҳайдовчиси С.га нисбатан Маъмурий жавобгарлик тўғрисидаги кодекснинг 128-3-моддаси (транспорт воситалари ҳайдовчиларининг белгиланган ҳаракат тезлигини ошириб юбориши) билан маъмурий баённома расмийлаштирилган.
Шунингдек, идора маълумотларига кўра, қоидабузар ҳайдовчилар билан профилактик суҳбат олиб борилган.
Аввалроқ Хоразмда 12,5 минг нафар қоидабузар ҳайдовчидан 3,8 млрд сўмдан ортиқ қарздорлик ундирилгани тўғрисида хабар берилганди. Жаримани тўлашдан бош тортган қарздорларга тегишли бўлган 137 та автотранспорт воситалари жарима майдончасига жойлаштирилган.
Изоҳ (0)