“Namangan” YPX maskanida xizmat olib borayotgan yo‘l-patrul xizmati xodimlari tomonidan qoidabuzar haydovchiga chora ko‘rildi. Bu haqda IIV Yo‘l harakati xavfsizligi xizmati xabar berdi.
Qayd etilishicha, 1-mart kuni YPX xodimlari tomonidan Mercedes-Benz rusumli avtomobil to‘xtatilib tekshirilganda, haydovchi transport vositasining davlat raqam belgisini to‘g‘ri aniqlanishiga xalaqit beruvchi qoplama surtib olgani maʼlum bo‘lgan.
Haydovchiga nisbatan tegishli tartibda maʼmuriy bayonnoma rasmiylashtirilib, avtomobil vaqtincha saqlash uchun jarima maydoniga qo‘yilgan.
Yo‘l harakati qoidalariga ko‘ra, transport vositasida ro‘yxatdan o‘tkazish davlat raqami belgilarini ko‘rinishini cheklaydigan, to‘g‘ri aniqlanishiga xalaqit beradigan har-xil buyumlar o‘rnatilgan va qoplamalar bilan qoplangan bo‘lsa bunday transport vositalaridan foydalanish taqiqlanadi.
Ma’muriy javobgarlik to‘g‘risidagi kodeksning 127-moddasi ikkinchi qismiga ko‘ra, transport vositasiga davlat raqam belgilarini ko‘rish imkoniyatini cheklaydigan, ularni anglashga to‘sqinlik qiladigan turli ashyolar o‘rnatish va qoplama surtish — fuqarolarga bazaviy hisoblash miqdorining bir baravaridan uch baravarigacha, mansabdor shaxslarga esa — uch baravaridan besh baravarigacha miqdorda jarima solishga sabab bo‘ladi.
Eslatib o‘tamiz, 2022-yil avgustda Andijonda davlat raqamini yechib harakatlangan Mercedes-Benz haydovchisiga chora ko‘rilgandi.
Izoh (0)