Ijtimoiy tarmoqda PAA 267 davlat raqam belgisini avtomobil salonida noma’lum shaxs (yo‘lovchi) qo‘lida ushlagan holda harakatlangani aks etgan video joylashtirilgan. Bu haqda “Revizor” xabar bermoqda.
Qayd etilishicha, ushbu davlat raqam belgisi Andijon viloyati hokimiga xizmat qiluvchi Prado rusumli transport vositasiga tegishli.
Ma’muriy javobgarlik to‘g‘risidagi kodeksning 125-moddasi 5-qismiga ko‘ra, davlat raqam belgisi o‘zboshimchalik bilan yechib olingan transport vositalarini boshqarish BHMning besh baravari miqdorida jarima solishga sabab bo‘ladi.
Holat yuzasidan Andijon viloyati hokimi matbuot kotibi Muslimbek Ibrohimov “Daryo”ga izoh berdi. Unda aytilishicha, lavha oldingi yillarda tasvirga olingan.
Rahbariyat vakili mashinada bo‘lgan taqdirda, bu kabi holatlarga yo‘l qo‘yilmasligini barcha birdek tushuna oladi. Bu kabi holat biror xodimning ish vazifasiga nisbatan mas’uliyatsiz qarashidan yuzaga kelishi mumkin.
Shu holatdan kelib chiqqan holda o‘sha vaqtning o‘zida xodimlarga tegishli tartibda ogohlantirish berilgan va bunday holatlarga yo‘l qo‘ygan bir nafar xodim vazifasidan ozod qilingan, — deyiladi hokimlik axborotida.
Izoh (0)