Navoiy viloyatida tarkibida tilla zarralari bo‘lishi mumkin bo‘lgan qumlarni olib kelayotgan Cobalt haydovchisi Yo‘l patrul xizmati xodimlariga pora berishga urindi. Bu haqda IIV Yo‘l harakati xavfsizligi xizmati xabar berdi.
Qayd etilishicha, 9-mart kuni Navbahor kuzatuv postida xizmat olib borayotgan YPX xodimi Nurota yo‘nalishi bo‘yicha harakatlanib kelayotgan Cobalt rusumli transport vositasini to‘xtatgan. O‘rganishlar davomida avtomashina yukxonasida qopga va beshta yelim idishga solingan, tarkibida tilla zarralari bo‘lishi mumkin bo‘lgan qumlar borligi aniqlangan.
Inspektorlar mashinani jarima maydoniga joylashtirgan. Haydovchi esa avtomobilini chiqarib berish evaziga YPX xodimiga 1 million so‘m miqdorida pora taklif qilgan. Inspektor uning bu xatti-harakati noqonuniy ekani, Jinoyat kodeksining tegishli moddalari bilan jinoiy javobgarlik borligini tushuntirgan.
Shundan so‘ng, fuqaro shu joyda xizmat olib borayotgan YPX batalyoni safarbar guruhi komandiri o‘rinbosari bilan muloqotga kirishgan va unga ham pora taklif qilgan. Komandir o‘rinbosarining Navoiy viloyati IIB boshlig‘i nomiga yozgan bildirgisiga asosan IIV Shaxsiy xavfsizlik bo‘limi va departament xodimlari tomonidan tezkor tadbir o‘tkazilgan hamda fuqaro 1 million pulni berayotganida ashyoviy dalillar bilan ushlangan.
YPX xodimlariga pora berish holatlari
2023-yilda Buxoroda mast holda mashina boshqargan haydovchi YPX inspektoriga 100 dollar pora berishga uringani to‘g‘risida xabar berilgandi. Shuningdek, Boysun tumanida YPX inspektoriga pora berishga uringan qoidabuzar haydovchiga nisbatan jinoyat ishi qo‘zg‘atilgan edi. O‘sha yilning aprel oyida bo‘lsa Surxondaryoda YPX inspektori 800 dollar pora olayotganida qo‘lga tushgandi.
Izoh (0)