Surxondaryo viloyati Boysun tumanida YPX inspektoriga pora berishga uringan qoidabuzar haydovchiga nisbatan jinoyat ishi qo‘zg‘atildi. Bu haqda IIV YHXX axborot xizmati xabar berdi.
Qayd etilishicha, 14-mart kuni Boysun tumanida xizmat olib borayotgan viloyat IIB JXX YHXB inspektori Komilov tomonidan Nexia avtomobili to‘xtatilgan. Tekshiruv davomida Qarshi shahrida yashovchi fuqaro mazkur transport vositasini ishonchnomasiz boshqarib kelayotgani ma’lum bo‘lgan.
Holat yuzasidan ma’muriy bayonnoma rasmiylashtirilib, avtomashina vaqtincha saqlash jarima maydoniga joylashtirilgan.
Shundan so‘ng qoidabuzar haydovchi YPX xodimiga mashinani jarima maydonidan chiqarib berishi va o‘ziga nisbatan tuzilgan ma’muriy bayonnomani bekor qildirishi uchun 1,5 million so‘m pora taklif qilgan.
YPX xodimi haydovchini bu harakati uchun javobgarlik mavjudligini bir necha bor aytgan bo‘lsa-da, u pora taklif qilishni davom etgan. Safdor Komilovning bildirgisiga asosan IIV Shaxsiy xavfsizlik bosh boshqarmasi va departamentning Boysun tumani bo‘limlari xodimlari tomonidan tezkor tadbir olib borilib, haydovchi I.Ch. YPX xodimiga 1,5 million so‘mni berganida ushlangan.
Hozirda fuqaroga nisbatan Jinoyat kodeksining 211-moddasi (pora berish) bilan jinoyat ishi qo‘zg‘atilgan bo‘lib, tergov harakatlari olib borilmoqda.
Avvalroq Buxoroda mast holda mashina boshqargan haydovchi YPX inspektoriga 100 dollar pora berishga uringani to‘g‘risida xabar berilgandi.
Izoh (0)