Surxondaryo viloyati Uzun tumanida YPX inspektori pora olayotganida qo‘lga tushdi. Bu haqda viloyat prokuraturasi matbuot xizmati xabar berdi.
Qayd etilishicha, Davlat xavfsizlik xizmati Uzun tumanlararo bo‘limi hamda Bosh prokuratura huzuridagi departament, tuman prokuraturasi tomonidan fuqaroning murojaati bo‘yicha hamkorlikda tezkor tadbir o‘tkazilgan.
Tadbir davomida Uzun tuman IIB JXX YHXG maʼmuriy huquqbuzarlik materiallarini ko‘rib chiqish bo‘yicha inspektori katta serjant Sh.A. fuqaro K.Q.ga tegishli bo‘lgan Gentra’ning old oynalari maxsus ruxsatnomasiz qoraytirgani holati bo‘yicha tegishli hujjatlarni rasmiylashtirmasdan jarimaga tortmaslikni vaʼda qilib, evaziga undan 800 AQSH dollari miqdorida pul mablag‘larini taʼmagirlik yo‘li bilan talab qilgani aniqlangan.
Inspektor kelishilgan 800 AQSH dollarini Uzun tumani “Bahoriston” mahallasi, N.Ramozonov ko‘chasida joylashgan tuman IIB YHXG maʼmuriy amaliyot bo‘limi binosida olgan vaqtida jinoyat ustida ushlangan.
Mazkur holat yuzasidan 9-aprel kuni departamentning Uzun tuman bo‘limi tomonidan Jinoyat kodeksining 210-moddasi (pora olish) 2-qismi “v” bandi bilan jinoyat ishi qo‘zg‘atilib, hozirda tuman prokuraturasi tomonidan tergov harakatlari olib borilmoqda.
Avvalroq Buxoroda mast holda mashina boshqargan haydovchi YPX inspektoriga 100 dollar pora berishga uringani to‘g‘risida xabar berilgandi. Shuningdek, Boysun tumanida YPX inspektoriga pora berishga uringan qoidabuzar haydovchiga nisbatan jinoyat ishi qo‘zg‘atilgan edi.
Izoh (0)