Farg‘ona shahrida Damas haydovchisi YPX xodimining ratsiyasini olib, qochib ketgani to‘g‘risida xabar berilgandi. Farg‘ona viloyati IIBning ma’lum qilishicha, ushbu shaxsga nisbatan qonuniy chora ko‘rilgan.
Qayd etilishicha, fuqaro M.Sh. jamoat joyida haqoratli so‘zlar bilan so‘kinib, jamoat tartibini va fuqarolarning osoyishtaligini buzgan. Shuningdek, u ichki ishlar organlari xodimining qonuniy talablarini bajarmagan hamda IIO xodimiga tegishli maxsus vositani olib, ketib qolgan.
Damasʼda qatnayman. Xodim keldi, hujjatlarimni ko‘rsatdim. Inspektor noto‘g‘ri parkovka qilinganini aytdi. Jarima qimmatligidan jahlim chiqib so‘kindim va ratsiyasini olib ketdim. Qilgan ishimdan pushaymonman. Boshqa takrorlanmaydi. Xodimlar va fuqarolardan harakatlarim uchun kechirim so‘rayman, — deydi haydovchi.
Holat bo‘yicha to‘plangan hujjatlar asosida Jinoyat ishlari bo‘yicha Farg‘ona shahar sudida ko‘rib chiqilib, unga nisbatan 5 sutka maʼmuriy qamoq jazosi qo‘llanilgan.
Eslatib o‘tamiz, 2023-yil mart boshlarida Qashqadaryo viloyati Shahrisabz shahrida ichki ishlar organi xodimining ovqatlanib o‘tirgan joyiga bostirib kirib, tasvirga olgan va ijtimoiy tarmoqlarga tarqatganlarga chora ko‘rilgandi. Shuningdek, aprel oyida Toshkentda ichki ishlar xodimini o‘ldirib, yoqib yuborgan 3 erkakka hukm o‘qilgani to‘g‘risida xabar berilgan edi.
Izoh (0)