Buxoroda ikki nafar IIB xodimi giyohvand moddalar savdosiga aralashgani aniqlanib, jinoyat ishi qo‘zg‘atildi. Bu haqda IIV axborot xizmati rahbari Shoxruh G‘iyosov xabar qildi.
Ijtimoiy tarmoqlarda DXX tomonidan ikki shaxs og‘ufurushlik bo‘yicha tezkor tadbir davomida qo‘lga olingani, ularning biri jinoyat qidiruv bo‘linmasi boshlig‘i, ikkinchisi JQB katta tezkor vakili ekanligi haqida xabarlar tarqaldi.
IIV axborot xizmati rahbarining ma’lum qilishicha, 16-mart kuni Buxoro viloyati ichki ishlar boshqarmasining ikki nafar ofitser xodimlari giyohvand moddalar noqonuniy aylanmasiga aralashganlari aniqlanib, hamkor tashkilotlar bilan birgalikda o‘tkazilgan tezkor tadbir davomida jinoyat ustida qo‘lga olingan.
Hozirda holat yuzasidan Jinoyat kodeksining 25-moddasi, 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) 5-qismi bilan jinoyat ishi qo‘zg‘atilgan bo‘lib, tergov harakatlari olib borilmoqda.
Izoh (0)