Buxoro viloyatida avtomobilni mast holda boshqargan haydovchi YPX inspektoriga pora berishga uringan vaqtida qo‘lga olindi. Bu haqda viloyat IIB axborot xizmati xabar berdi.
Qayd etilishicha, fuqaro YHXB inspektoriga spirtli ichimlik isteʼmol qilgan holda avtomobil boshqarib, yo‘l harakati qoidabuzarligini sodir etgani yuzasidan maʼmuriy bayonnoma rasmiylashtirmaslik va avtomashinani jarima maydonidan chiqarib berish evaziga 100 AQSH dollari miqdorida pora berishni taklif qilgan.
Inspektorning Ichki ishlar boshqarmasi boshlig‘i nomiga yozgan bildirgisi asosida 6-mart kuni soat 11:40 larda IIV Shaxsiy xavfsizlik bosh boshqarmasi, Buxoro viloyati bo‘yicha boshqarma hamda departamentning viloyat boshqarmasi xodimlari hamkorligida tezkor tadbir o‘tkazilgan. Tadbir davomida Kogon shahrida joylashgan avtomobil maydonchasida fuqaro inspektorga 100 AQSH dollarini pora tariqasida bergan vaqtida ushlangan.
Mazkur holat yuzasidan Jinoyat kodeksining 211-moddasi (Pora berish) 1-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
Izoh (0)