Navoiy viloyati Zarafshon tumanida YPX xodimiga pora berishga uringan qoidabuzar haydovchi qo‘lga olindi. Bu haqda IIV YHXX axborot xizmati xabar berdi.
Ma’lum qilinishicha, 27-fevral kuni Navoiy viloyati IIB JXX YHXB inspektori soat 09:15 lar atrofida “Zarafshon” yo‘l-patrul maskanida Navoiy—Zarafshon yo‘nalishida harkatlanib kelayotgan Nexia-2 avtomobiliga to‘xtash ishorasini bergan. Biroq haydovchi xodimning qonuniy talabiga bo‘ysunmasdan qochib ketgan.
Qoidabuzar haydovchi keyingi manzilda to‘xtatilganida, o‘zini Jizzax viloyatidan ekanini bildirgan 31 yoshli fuqaro avtomobilni tegishli hujjatlarsiz boshqargani ma’lum bo‘lgan. Haydovchisiga nisbatan Ma’muriy javobgarlik to‘g‘risidagi kodeksning 194 (Ichki ishlar organlari xodimining qonuniy talablarini bajarmaslik), 135-moddalari (Yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) bilan ma’muriy bayonnoma rasmiylashtirilib, avtomashina jarima maydonchasiga joylashtirilgan.
Haydovchi mashinani jarima maydonidan chiqarish va ma’muriy bayonnoma bo‘yicha chora ko‘rmaslik evaziga YPX xodimiga 1 million so‘m pora taklif qilgan. Shu kuni IIV Shaxsiy xavfsizlik bosh boshqarmasi Navoiy viloyati bo‘yicha boshqarmasi hamda departamentning Zarafshon bo‘limi xodimlari bilan tezkor tadbir o‘tkazilgan. Tadbirda fuqaro YPX xodimiga 1 million so‘mni bergan vaqtida qo‘lga olingan.
Hozirda holat yuzasidan Jinoyat kodeksining 211-modda (Pora berish) 1-qismi bilan tergov harakatlari olib borilmoqda.
Izoh (0)