Buyuk Britaniyada Rossiya bilan diplomatik aloqalarni uzish uchun hech qanday sabab yo‘q. Bu haqda 7-mart kuni Rossiyaning Buyuk Britaniyadagi elchisi Andrey Kelin “TASS” nashriga maʼlum qilgan.
“Bunday radikal qadam uchun asos yo‘q. Mamlakatlarimiz urush holatida emas. Londonning o‘zi ham diplomatik kanallar va elchixonalar ochiq bo‘lishidan manfaatdor ekanini taʼkidlab keladi. Shu boisdan ham bunday chaqiriqlar odatdagidek layoqatsiz siyosatchilar tomonidan eʼlon qilinadi. Bunday chaqiriqlardan maqsad Rossiyaga qarshi siyosiy kurash maydonida ball ishlash”, — degan Buyuk Britaniyada vazifasini bajaruvchi rossiyalik diplomat.
Xabarga ko‘ra, Rossiya bilan munosabatlarni uzish yoki qayta ko‘rib chiqish ayni damda Britaniya parlamentida kun tartibidagi masalalardan biri. Ushbu boradagi muhokamalar Vladimir Putinning muxolifi Aleksey Navalniy vafot etishi ortidan yana kuchaydi. Britaniya Parlamenti deputatlaridan ayrimlari ikki tomon o‘rtasidagi munosabatlarni muzlatish uchun elchixonalarni yopishni ham taklif etgani aytilgan.
Birlashgan qirollik parlamenti deputati, konservator Tobias Ellvud Rossiya bilan diplomatik kanallarni nisbatan ochiq qoldirgan holda, rus elchisini Buyuk Britaniyadan chiqarib yuborishni taklif qilgan.
Izoh (0)