NATOga aʼzo davlatlar Shvetsiyaga qarashli Gotland orolini o‘zlari uchun qulay transport xabiga aylantirishi mumkin. Buning natijasida esa Estoniya, Latviya va Litvaning mudofaa sohasini kuchaytirish osonlashtiradi. Bu haqda G‘arb manbalari tarqatgan xabarlarga asoslanib, “TASS” nashri xabar berdi.
Xabarda aytilishicha, Shvetsiya hukumati Gotland orolini tranzit sifatida foydalanish uchun NATO ixtiyoriga berishga qarshi emas. Hududda alyans mudofaasi kuchayishidan Stokgolm ham manfaatdor.
Voqeaga munosabat bildirgan Latviya tashqi ishlar vaziri Krisyanis Karinsning aytishicha, Boltiq dengizi tez orada NATOning ichida joylashgan ko‘lga aylanadi. Ittifoq mudofaa salohiyati ortadi. Kelgusida hududdagi NATO xavfsizligiga tahdid soladigan yagona sektor Rossiyaning Kaliningrad viloyati va Belarusni birlashtiruvchi Suvalki koridori bo‘lib qolishi mumkin.
Maʼlumot o‘rnida, Vengriya parlamenti 26-fevral kuni Shvetsiyaning NATOga aʼzoligini ratifikatsiya qilgan edi. Shvetsiya davlatining bayrog‘i 11-mart kuni NATOning Bryusseldagi qarorgohida ko‘tarilishi eʼlon qilingan.
Izoh (0)